Team Philippines sasalang sa YOG sa Dakar

MANILA, Philippines — Pamumunuan nina national junior tracksters Pi Durden Wangkay at Naomi Marjorie Caesar ang Team Philippines sa pagsalang sa 2026 Youth Olympic Games (YOG) sa Dakar.

Kumpiyansa si Philippine Olympic Committee president Abraham “Bambol” Tolentino sa tsansa ng siyam na batang atleta sa event na nakatakda sa Oktubre 31 hanggang Nobyembre 13.

“They are the future Olympians, future world champions and the Dakar YOG will provide them the platform to follow the footsteps of the Diazes and Yulos,” sabi ni Tolentino kina Olympic gold medalists Hidilyn Diaz-Naranjo at Carlos Yulo.

Tatakbo si Wangkay sa men’s 200-meter run, habang sasalang si Caesar sa women’s 800m sa athletics.

Ang iba pang miyembro ng delegasyon ay sina Jamesray Mishael Ajido (men’s 100m butterfly), Riannah Chantelle Coleman (women’s 100m breaststroke) sa aquatics, Maritanya Krog (women’s road at individual time trial) sa cycling, Tchelzy Maayo at Hillarion Palles III sa artistic gymnastics, Angel Polo (women’s Taijiquan combined) sa wushu at Jade Justiniane (windsurfing) sa sailing.

Ito ang ikaapat na pagkakataon na idaraos ang Youth Olympics Games matapos sa Singapore (2010), Nanjing (2014) at Buenos Aires (2018) kahanay ng Summer Olympics.

Dalawang medalya pa lamang ang napapanalunan ng Pilipinas sa YOG mula sa gold medal ni Luis Gabriel Moreno sa mixed international team event ng archery katambal si Chinese Li Jiaman sa Nanjing at ang silver ni Christian Tio sa boys’ twin-tip racing ng kiteboarding.

Halos 2,700 youth athletes mula sa higit 200 National Olympic Committees, kasama ang isang Youth Refugee Olympic Team, ang lalahok sa 25 competition at 10 engagement sports.

Kagagaling lamang ng Team Philippines sa kampanya sa nakaraang 20th Asian Games sa Aichi-Nagoya, Japan kung saan humakot ang mga Pinoy athletes ng apat na gold, siyam na silver at 16 bronze medals.

Sunod na sasabak ang mga atleta sa Asian Indoor and Martial Arts Games sa Riyadh, Saudi Arabia sa Disyembre 13 hanggang 21.