PHO! Pundo nga tubig kinahanglang luwas imnon

CEBU, Philippines — Gipahimangnoan sa Provincial Health Office (PHO) sa Sugbo ang publiko sa pag-amping sa pagpundo og tubig panahon sa umaabot nga Super El Niño tungod sa posibleng pagtaas sa risgo sa dengue ug uban pang mga sakit.

Si Provincial Health Officer Dr. Sheila Faciol miingon nga gilakip sa probinsya ang pagpugong sa pagdaghan sa mga lamok sa ilang health response plan alang sa Super El Niño, ilabina kay posibleng magtipig og tubig ang mga panimalay tungod sa kakulang sa suplay.

“Cover lang gyud ang tanan-tanan gipundo nga tubig, tabunan gyud siya, para dili mangitlog ang lamok,” matud ni Faciol. Giawhag niya ang mga residente nga tabonan pag-ayo ang tanang sudlanan nga adunay gitip-igang nga tubig aron dili kini mahimong itloganan sa mga lamok nga mahimong magdala sa dengue.

Gawas sa dengue, giandam usab sa PHO ang mga lakang batok sa mga sakit nga may kalabotan sa kainit ug sa kontaminadong tubig, nga posibleng mosaka ang risgo panahon sa taas nga hulaw ug kakulang sa limpyo nga tubig.

Matud ni Faciol, gibahin sa upat ka cluster ang health response plan sa probinsya: medical services, water, sanitation and hygiene, nutrition, ug mental health.

Ubos sa medical cluster, nag-andam ang PHO sa pagtubag sa mga kaso sa kalibanga ug mga sakit nga may kalabotan sa grabeng kainit, sama sa heat exhaustion ug heatstroke.

Usa usab sa gikabalak-an sa PHO ang kaluwasan sa tubig nga imnon sa publiko, ilabina kon mapugos ang mga residente sa pagpangita og alternatibong tinubdan sa tubig tungod sa kakulang sa suplay maong apil sa ilang plano ang pagapud-apod og water-purification tablets nga nailhang Aquatabs ug mga sudlanan sa tubig.

Makig-alayon usab ang probinsya sa mga lokal nga kagamhanan sa pag-apod-apod sa mga suplay, diin motabang ang PHO sa mga pagpangandam nga gihimo na sa mga municipal ug city health office.

Ang 16 ka provincial hospital sa Sugbo nag-andam usab sa tagsa-tagsa nilang El Niño response plan, nga gihulat pa ni Faciol. Dugang niini, nag-awhag siya sa publiko nga mangandam sa posibleng kakulang sa tubig ug magbantay batok sa mga sakit nga dala sa lamok, kontaminadong tubig ug grabeng kainit. IBM BANAT NEWS