San Beda ‘di magpapaawat sa Perpetual Help
MANILA, Philippines — Tangka ng defending champion San Beda University na pahabain ang kanilang winning streak sa tatlo pagharap nila sa University of Perpetual Help System DALTA sa NCAA Season 102 men’s basketball tournament sa Playtime FilOil EcoOil Centre sa San Juan City.
Tangan ang 4-2 record, muling sasandalan ng Red Lions ang bangis ni Aldous Torculas upang masikwat ang panalo sa Altas at mapalapit sa tuktok ng Group A na kasalukuyang inuupuan ng College of Saint Benilde, (5-1).
Magtutuos ang San Beda at Perpertual ngayong alas-5 ng hapon pagkatapos ng labanan sa pagitan ng Letran at Lyceum sa alas-3 ng hapon.
Si Torculas ang naging susi sa nakaraang 74-66 overtime win ng San Beda kontra tigasing Letran.
Pumukol si Torculas ng panablang tres para sa 61-61 sa huling 4.1 segundo ng fourth period at dahil naging mahigpit ang depensa ng Red Lions ay nauwi sa OT ang laban.
Muling sumalpak ng panelyong tres si Torculas sa extra period para hawakan ng San Beda ang 10-point lead, 72-62, may 2:15 minuto sa oras.
“That’s what San Beda basketball is and I think we were able to do that defensively even if we struggled offensively.” sabi ni head coach Yuri Escueta.
Makakatuwang ni Torculas sina Dan Marcelo at Andrei Ugaddan para sa Red Lions.
Hawak naman ng Altas ang 2-3 baraha at nakaupo sa pangatlong puwesto sa Group B.
Samantala, pakay naman ng Knights na bumangon mula sa masaklap na pagkakadapa para muling sumosyo sa top spot sa Group B.
- Latest
