MPBL: Mindoro may playoff seat; Zamboanga buhay pa

MANILA, Philippines — Tinakasan ng Mindoro Tamaraws ang Basilan Steel, 77-72, para makapasok sa South Division playoffs ng SportsPlus MPBL (Maharlika Pilipinas Basketball League) 2026 Season sa Calapan City Coliseum sa Oriental Mindoro.

Bumira si Jayjay Caspe ng 23 points, kasama rito ang limang three-point shots, bukod sa 11 rebounds, dalawang assists at dalawang steals para tanghaling SportsPlus Best Player of the Game.

Nagdagdag si Bambam Gamalinda ng 10 points para sa pag-upo ng Tamaraws sa No. 7 spot sa South.

Lalabanan nila ang second-ranked Biñan Tatak Gel sa isang best-of-three quarterfinal series ng two-division, 26-team tournament.

Umiskor si Byron Villarias ng 17 points para pamunuan ang Steel, habang may 13, 11 at 10 markers sina Gab Cometa; John Wilson at Neil Owens, ayon sa pagkakasunod.

Kinuha ng Mindoro ang isang 16-point lead bago agawin ng Basilan ang 72-70 bentahe sa huling 1:58 minuto ng fourth quarter.

Bumalikwas ang Tamaraws ni four-time NCAA champion coach Frankie Lim sa pangunguna ni Gamalinda para talunin ang Steel.

Pinamunuan nina Pola Mayor Jennifer “Ina Alegre” Cruz, team owner ng Tamaraws, at Calapan City Mayor Doy Leachon ang ceremonial toss bago ang laro.

Samantala, nirapido ng Zamboanga SiKat ang Imus Yangkee, 86-61, upang makapuwersa ng knockout game sa Basilan para sa pang-walo at huling quarterfinal slot sa South.

Kumamada si Brandon Wilson ng 12 points at may 10 markers si Levi Hernandez para pamunuan ang SiKat, habang may 12 assists si Paeng Are na hinirang na MPBL first One Versus One champion.