Warriors naglaraw sa ikalima nga daog

CEBU, Philippines — Ang University of San Carlos (USC) Warriors nagtinguha sa ikalima nilang daog sa dihang ilang engkwentrohon ang Cebu Institute of Technology-University (CIT-U) Wildcats sa Cebu Schools Athletic Foundation, Inc. (CESAFI) Season 26 basketball tournament karong adlawa (Lunes, Septiyembre 28) sa Cebu Coliseum. Magsugod ang ilang kumbati sa alas 7:45 sa gabii. Ang Warriors nagkupot og 4-1 rekord, nga maoy labing nindot nilang sinugdanan sa liga nga gipainit sa 81-68 nilang pagpakurat sa four-time defending champions University of the Visayas (UV) Green Lancers sa una nilang duwa niadtong Agosto 30. Nahagba ang USC sa unang higayon sa mga kamot sa University of Cebu (UC) Webmasters, 81-63, apan impresibo silang namawi uban ang tulo ka sagunson nga daog batok sa University of Southern Philippines Foundation (USPF) Panthers, 77-63; University of Cebu Lapu-Lapu and Mandaue (UCLM), 74-53; ug University of the Philippines (UP) Cebu Fighting Maroons, 54-46.

Ang Warriors ni coach Paul Joven nanghinaut nga inaton ang labing taas nilang ratsada sa dihang ilang banggaon ang Wildcats, nga nagtangag og 3-2 nga baraha.Sa juniors division, ang University of San Jose-Recoletos (USJ-R) Jaguar Cubs mosuway pag-inat sa perpekto nilang marka ngadto sa 4-0 sa dihang ilang harongon ang USPF Baby Panthers, nga wa pay daog sa duha ka duwa, sa alas 6:15 sa gabii nga pasiunang sangka.