Simsri nagpabiling kampiyon, Suganob sunod niyang target

CEBU, Philippines — Si Thanongsak Simsri (41-1, 36 KOs) sa Thailand nanginahanglan og duha lamang ka hugna aron patikangkangon ang Pinoy niyang challenger nga si Mark "Rasta Mac" Vicelles (21-3-1, 11 KOs) ug pagpabiling International Boxing Federation (IBF) light flyweight champion niadtong Sabado, Septiyembre 26, didto sa Fujisan Messe Industrial Exchange Exhibition Hall sa Shizuoka, Japan.

Agresibo kaayo si Vicelles ug maoy mikontrola sa unang hugna, apan dali nga giusab ni Simsri ang dagan sa away sa ikaduhang hugna.

Ang defending champion mipakamang ni Vicelles sud sa duha ka sunod-sunod nga higayon gamit ang solidong tuong suntok segundos lamang ang gintang sa wala pa siya mobirada og laing sagunson nga kumo nga nakapuwersa ni reperi Koji Tanaka pag-undang sa away sa oras nga 2:05 sa ikaduhang hugna.

Ang 26-anyos nga si Simsri naglantaw sunod sa obligado niyang pagdepensa batok ni Regie "Filipino Phenom" Suganob (19-1, 8 KOs) sa PMI Bohol Boxing Stable.

Si Suganob nakaangkon og katungod nga mohagit sa trono ni Simsri human niya gi-knockout si two-time world light flyweight champion Sivenathi "The Special One" Nontshinga sa South Africa sa ilang IBF title eliminator niadtong Septiembre 12 didto sa Bohol Wisdom School (BWS) Gymnasium sa dakbayan sa Tagbilaran. Ang kampiyonato nilang Simsri ug Suganob gikinahanglan nga mahitabo sa katapusan sa Enero 2027.

Si PMI Boxing CEO Atty. Floriezyl Echavez Podot mipadayag nang daan sa iyang kaandam nga ipahigayon ang IBF world title fight sa Bohol kon mahatagan og oportunidad.

Sa laing bahin, sa susamang promosyon didto sa Japan, ang kababayan ni Vicelles nga si Pete "Prime Time" Apolinar (21-7-1, 14 KOs) mi-TKO ni Shunpei Ohata sa ikasiyam nga hugna aron sakmiton ang WBO Asia Pacific junior lightweight title. Didto sa Pattaya, Thailand, si two-division world champion Marlon "The Nightmare" Tapales (42-5, 23 KOs) mibalik nga madaogon. Iyang gipakamang si Thai Nirun Baonok sa ikaduhang hugna aron langkaton ang World Boxing Foundation (WBF) International featherweight belt. Si IBF Pan Pacific lightweight champion Criztian "Golden Boy" Laurente, nga kauban ni Tapales sa Sanman Boxing, miinat sa perpekto niyang rekord ngadto sa 17-0 human gipalukapa si Benchalong Tanbu sa ikatulong hugna aron birahon ang korona sa WBF Intercontinental lightweight division.