Saclag kinapos sa Asian Games gold
MANILA, Philippines — Ginawa na ni Jean Claude Saclag ang lahat ng kanyang magagawa para maibigay ang kauna-unahang gold medal ng Pilipinas sa 20th Asian Games sa Aichi-Nagoya, Japan.
Ngunit hindi pa rin ito sapat.
Bigo si Saclag kay Otabek Rajabov ng Tajikistan sa finals ng men’s tradiional -65kg division ng mixed martial arts competition kahapon sa Nagoya City Inae Sports Center.
Ito ang ikalawang Asiad silver ng Team Lakay member matapos sumegunda sa wushu sanda 60kg competitions sa 2014 Asian Games sa Incheon, Korea.
Ang gold medal sana ang magandang regalo ni Saclag sa kanyang sarili sa pagdiriwang niya ng ika-32 kaarawan sa Biyernes.
“Sayang talaga. Napaghandaan naman ng ground game. Ginawa ko naman lahat,” panghihinayang ni Saclag sa nakawalang pagkakataon para sa una niyang Asiad gold. “Sorry na, at least may silver tayo. Hindi tayo uwing walang medal. Sayang talaga.”
Iba ang inilaro ni Rajabov, isang dating MMA world juniors champion, sa inaasahan ni Saclag.
Ginamit ng Tajikistan fighter ang wrestling at takedowns para pigilan ang matutulis na suntok ng Pinoy MMA artist.
“Yes, well fought. Big heart. He apologized. I said, ‘That is a rare silver.’ Be proud JC,” ani Philippine Sports Commission (PSC) chairman Patrick ‘Pato’ Gregorio kay Saclag na isa ring three-time SEA Games gold medalist sa kickboxing.
Papasok sa finals ay magkakasunod na tinalo ni Saclag sina Saud Fawaz Almolhem ng Saudi Arabia at Daisuke Murayama ng Japan.
Samantala, nakuntento si Carlos Alvarez sa bronze medal matapos matalo kay Yerkingali Burkutalin ng Kazakhstan via TKO sa semifinals.
- Latest
