Alas Women papalag sa Qatar

MANILA, Philippines — Tatlong panalo ang ka­ilangan ng Alas Pilipinas para makuha ang ninth place sa classification round ng 20th Asian Games women’s indoor volleyball competition sa Aichi-Nagoya, Japan.

Sisimulan ito ng mga Pinay spikers sa pagsagupa sa Qatar ngayong alas-6 ng gabi sa Okazaki Chuo Sogo Park Gym sa Aichi.

Ang iba pang lalaro sa classification ay ang Hong Kong, Mongolia, Nepal at Kyrgyzstan.

Ito na lamang ang pina­kamataas na puwestong makukuha ng Alas Women makaraang tumapos sa pang-walong posisyon sa huli nilang Asiad appea­rance noong 2018 sa Jakarta, Indonesia.

“We’re going for ninth,” wika ni Japanese coach Taka Minowa sa mga Pinay hitters. “We should win three games in a row. That’s what we should do in this Asian Games.”

Muling babandera sa tropa si veteran setter Jia De Guzman.

“We want as much as possible to win three games in a row pero isa-isahin muna namin,” sabi ng 30-anyos na si De Guzman.

Matapos ang 18-25, 22-25, 8-25 kabiguan sa defending champion at nine-time gold medalist China noong Miyerkules ay yumukod ang Alas Women sa Kazakhstan, 29-27, 24-26, 23-25, 19-25, noong Huwebes.

Sa nasabing pagtiklop sa mga Kazakhs ay bumira si Angel Canino ng game-high 24 points, habang may 20 markers si Alyssa Solomon.

“Kung ano man siguro ang nakuha namin and kung ano pa ‘yung mga lapses namin as a team, siguro ‘yun po ‘yung gusto namin i-improve, and hopefully po makuha po namin ‘yung result na gusto po namin,” ani Canino.

Pasok sa quarterfinals ang China, Kazakhstan, Thailand, Chinese Taipei, Vietnam, South Korea, Indonesia at Japan.