Hulgaon ang eskuylahan kun exam o deadline sa assignment

CEBU, Philippines — Giingong gigamit sa pipila ka estudyante ang online nga mga hulga batok sa mga eskwelahan aron malikayan ang eksaminasyon, assignment ug uban pang school requirements, sumala sa Cebu Police Provincial Office (CPPO).

Matud ni CPPO Director Police Col. Abubakar Udang Mangelen Jr., nakita sa ilang imbestigasyon nga kasagaran sa mga hulga gipadala o gipatik kun hapit na ang mga tests o oral exam sa ilang klase, o deadline sa mga assignment ug schoolwork.

 “This is becoming a sort of modus operandi among our students,” matud ni Mangelen.

Sukad Hulyo, 19 na ka insidente sa lain-laing hulga batok sa mga eskwelahan ang natala sa CPPO sa tibuok Sugbo.

Ang 13 niini nasulbad na kay nangailhan ang mga nagbinuang ug gidala sila sa police station alang sa imbestigasyon. Ang siyam nila mga menor de edad nga gipaubos na sa intervention programs  sa mgaMunicipal Social Welfare and Development Office.

Samtang nagpadayun ang imbestigasyon sa upat pa ka kaso uban sa tabang sa Regional Anti-Cybercrime Unit o RACU aron mailhan ang mga responsable sa online nga mga hulga.

Samtang, gipakusgan sa Cebu City Police Office o CCPO ang security coverage sa mga eskwelahan sa Cebu City atol sa nagpadayong isyu sa mga hulga batok sa mga eskwelahan.

Niadtong Septiyembre 10 gisugdan sa CCPO ang revitalized school security coverage sa 184 ka eskuylahan apil na ang 91 ka pribadong eskuylahan sa siyudad pinaagi sa dugang foot patrol, mobile patrol ug motorcycle units, lakip ang regular nga pagbisita sa mga eskuylahan ug pakigtambayayong sa mga school authorities. Matud ni Police Lt. Col. Gerard Ace Pelare, deputy city director for operations sa CCPO, proactive measure kini batok sa mga hulga ug krimen nga mahimong mahitabo sa mga eskwelahan. Gimandoan usab ang mga pulis nga mag-random roving sa mga eskwelahan, lakip ang pag-adto sa mga classroom ug pakig-estorya sa mga estudyante.

Matud ni Pelare, ipadayon sa CCPO ang maong school security coverage ug dili lang kini temporaryong deployment ilabi na sa mga importanteng oras, ilabi na sa pagsulod sa mga estudyante ug sa ilang paggawas sa hapon.

Matud ni Pelare, ang Oplan Pakigsandurot mao ang mother program nga gisundan sa CCPO ug diin gi-align sa police office ang ilang mga programa. Ang school security initiative usa usab sa priority programs ni Police Regional Office in Central Visayas Director Police Brig. Gen. Arnold Evangelista Abad ug ni CCPO City Director Police Col. Ricky C. Sumalde.—  IBM BANAT NEWS