Bata gianod sa sapa

CEBU, Philippines — Usa ka 9-anyos nga batang lalaki ang naanod sa kusog nga baha sa sapa sa Sitio Gawad Kalinga sa Barangay Budlaan nga nahimutang sa bukirang barangay sa Dakbayan sa Sugbo kagahapon, Septembre 15, 2026.

Sa inisyal nga impormasyon gikan kang Konsehal Dave Tumulak kinsa tsirman sa Cebu City Disaster Risk Reduction and Management Council (CCDRRMC), mga pasado alas 3:00 sa hapon, ang bata nagduwa og bola daplin sa sapa.

Apan sa nalagpot ang bola ngadto sa sapa, gisuwayan niya og kuha ang bola sa sapa apan naatlan siya nga nagsugod na ang pag-uwan.

Tungod sa kakusog sa uwan, paspas sab ang pagsaka sa tubig baha hinungdan nga naanod ang bata uban sa kusog nga bul-og sa tubig.

Ang bata nakit-an pa sa mga tawo ug nakuptan pa diha sa Sitio Metavill sa Barangay Talamban tungod kay adunay mga residente nga misuway sa pagluwas kaniya.

Apan tungod sa kakusog sa bul-og sa tubig baha nabuhian kini ug padayon nga naanod sa sapa. Sa pagsuwat niining balita, nagpadayon pa ang search and rescue operation sa mga sa sakop sa CCDRRMO ug uban pang rescuers aron makita ang bata.

Gitawagan na usab ang mga awtoridad sa Dakbayan sa Mandaue aron maandam ang ilang rescue teams ugaling maanod ang bata ngadto sa ilang hurisdiksyon. — IBM BANAT NEWS