EST Cola basag sa PLDT

MANILA, Philippines — Binuksan ng PLDT ang kanilang title defense sa 25-23, 25-15, 26-28, 25-14 pagbugbog sa guest team EST Cola ng Thailand sa 2026 Premier Volleyball League (PVL) Invitational Conference kahapon sa Smart Araneta Coliseum.

Humataw si reigning PVL MVP Savi Davison ng 30 points mula sa 24 attacks, limang blocks at isang service ace para banderahan ang High Speed Hitters, habang may 16 markers si Mika Reyes.

Nagdagdag si Jovelyn Prado ng siyam na puntos at may walo at pitong marka sina Kim Kianna Dy at Majoy Baron, ayon sa pagkakasunod.

“First assignment, very challenging para sa amin,” wika ni  coach Rald Ricafort. “Kasi usually kapag may guest teams tayo sila muna iyong pinapanood natin.”

Umiskor si Nirarach Srikuta ng 14 points sa panig ng Thai guest squad kasunod ang 12 mar­kers ni Nannaphat Moonjakham.

Kinuha ng PLDT ang 2-0 bentahe sa laro bago nakasingit ang EST Cola sa third set, 28-26, sa likod nina Srikuta at Moonjakham.

Matapos magtabla sa 12-12 sa fourth set ay isang 8-0 atake ang pinamunuan nina Davison at Reyes para ilayo ang High Speed Hitters sa 20-12.

Mula rito ay hindi na naka­dikit ang mga Thai spikers.

Sa ikalawang laro, pinatumba ng Creamline ang Nxled, 25-20, 25-23, 23-25, 25-20, sa pagsisimula ng kanilang kampanya.

Bumira si Jaja Santiago-Minowa ng 19 points para pamunuan ang Cool Smashers kasunod ang 17 markers ni Jema Galanza.