NLEX Road Warriors nabangga ng Dyip
MANILA, Philippines — Ang hindi nagawa ng Terrafirma sa NLEX sa first round ay naisakatuparan nila sa second round.
Iniskor ni guard Brent Paraiso ang apat sa huling limang puntos ng Dyip sa fourth quarter para resbakan ang Road Warriors, 114-109, sa PBA Season 50 Governors’ Cup kahapon sa Ninoy Aquino Stadium sa Malate, Manila.
Pinaganda ng Terrafirma ang kanilang record sa 3-4 kasosyo ang Converge sa ikaapat na puwesto sa Group A.
Ito naman ang unang kabiguan ng NLEX sa kanilang pitong laro.
Nakabawi rin ang Dyip sa Road Warriors na umeskapo sa kanila sa first round, 101-100.
“It shows about a lot of character of the team. We know the type of fight we need to beat them,” sabi ni veteran guard Maverick Ahanmisi na nagtala ng 16 points, 10 assists at 3 steals para sa Terrafirma na nakatbangon mula sa 105-109 agwat sa NLEX sa huling 3:10 minuto ng fourth period.
Ang dalawang sunod na basket ni center Geo Chiu ang nagtabla sa Dyip sa 109-109, habang kumamada si Paraiso ng dalawang dikit na tirada para ungusan ang Road Warriors sa 113-109 sa natitirang 13.9 segundo.
Tumalbog ang four-point shot ni NLEX import DeQuan Jones sa huling 4.3 segundo.
Nagtala si import si Justin Strings ng 28 points, 11 rebounds at 6 assists para sa Terrafirma, habang may 18 at 16 markers sina Paraiso at JM Bravo, ayon sa pagkakasunod.
- Latest
