Ando bubuhat ng gold sa Asiad
MANILA, Philippines — Nakarekober na si national weightlifter Elreen Ando mula sa isang leg injury noong Disyembre at ngayon ay nakatutok sa pagbuhat sa gold medal sa 20th Asian Games sa Aichi-Nagoya, Japan.
Target ng 27-anyos na si Ando ang gintong medalya sa quadrennial meet matapos mag-uwi ng tanso sa women’s 64-kilogram division noong 2022 edition sa Hangzhou, China.
Sa Aichi-Nagoya Asiad ay sasalang ang Cebuana weightlifter sa mas mababang 61kg category.
“Lahat naman kami nag-a-adjust sa lahat ng new weight categories. Hindi ko alam sino na naman ‘yung kalaban ko sa China, sa Democratic People’s Republic of Korea, pero alam ko nandun na lahat ng mga world champion po,” ani Ando sa ‘GameOn’ program ni Arianne Mallare sa Sports Radio 918 AM.
Nakatakda ang Aichi-Nagoya Asiad sa Setyembre 19 hanggang Oktubre 4.
Dalawang beses lumaban ang 12-year veteran ng Philippine team sa Olympic Games.
Tumapos si Ando sa No. 7 spot sa women’s 64kg class sa 2020 Olympics sa Tokyo, Japan at pumuwesto sa No. 6 sa women’s 59kg division sa 2024 Games sa Paris, France.
Bumuhat din si Ando ng dalawang gold medals sa magkasunod na Southeast Asian Games noong 2023 sa Cambodia at sa Thailand noong 2025.
- Latest
