Dyip mibihag sa Tropa

CEBU, Philippines — Nakapasol og usa ka dakong isda ang Terrafirma Dyip.

Apan nag-agi usa sila og overtime sa wala pa gitumba ang defending champion TNT Tropang 5G, 111-106, sa PBA Season 50 Governors’ Cup niadtong Sabado sa gabii, Hulyo 25, didto sa Ynares Center-Antipolo.

Ang import nilang si Justin String miharos og 36 puntos ug 12 ka rebounds aron tabangan ang Dyip pagpakgang sa tulo ka sagunson nilang pilde.

Dako sab og naambag si Juami Tiongson, nga milansang og lima ka 3-pointers sa iyang 24 puntos, ingon man si Mavericks Ahamisi uban ang 20 puntos alang sa Dyip, nga nagkupot na karon og 2-3 rekord.

Si Jordan Heading mitali og 29 puntos, si RR Pogoy midugang og 23 puntos samtang sila si Rey Nambatac ug Kim Aurin nagkumboya'g 37 puntos apan dili kini igo kay ang TNT natagak sa 1-2.

Sa gihapon, ang TNT miduwa nga kuwang og tawo kay wala ang lima nila ka sinaligan apil sila si Jayson Castro ug Calvin Oftana.