60,000 ka pamilyang kabus makadawat og libreng bugas

CEBU, Philippines — Gibana-bana ngadto sa 60,000 ka pamilya’ng kabus sa Dakbayan sa Sugbo ang makadawat sa libreng bugas pinaagi sa P145 milyones nga Local Government Support Fund (LGSF) gikan sa nasudnong kagamhanan.

Giklaro ni Mayor Nestor Archival, Sr. nga ang libreng bugas lahi kini sa kasamtangang programa nga P20 kada kilo o "Benteng Bigas”.

Gipasabot ni Archival nga ang "Benting Bugas" usa ka partnership sa lokal ug nasudnong kagamhanan kinsa mao ang nagpalit sa bugas aron mabaligya kini sa mas ubos nga presyo ngadto sa mga kwalipikadong benepisyaryo.

Matud ni Archival nga walay gigasto ang lokal nga kagamhanan sa pagpalit sa bugas tungod kay ang papel sa siyudad mao lang ang pagtabang sa pag-package ug pag-apod-apod sa impormasyon ngadto sa mga kwalipikadong sektor sama sa senior citizens, persons with disabilities (PWDs), mga mananagat ug uban pa’ng kwalipikadong benepisyaryo.

Gibutyag sa mayor nga ang bayad sa bugas dili moagi sa city hall diin molahos na kini ngadto sa Food Terminal Incorporated (FTI) ug walay labot ang siyudad sa halin sa bugas. Apan sa bag-ong inisyatibo sa nasudnong kagamhanan ang siyudad maoy mopalit sa bugas gamit ang P145 milyones samtang ang Department of Social Welfare and Development (DSWD) maoy motino sa mga benepisyaryo base sa ilang listahan sa mga labing kabus o pamilyang labing nanginahanglan. Base sa datos nga gipresentar sa mayor atol sa iyang State of the City Address niadtong Hulyo 7, 2026 gilaoman nga makapalit ang siyudad og dul-an sa 180,000 ka sako nga tag 10-kilogram nga bugas nga maapod sa liboan ka pamilya sa siyudad.

Ang libreng bugas dako usab kini og matabang sa food security program sa administrasyon ni Archival aron mapagaan ang epekto sa pagsaka sa presyo sa palaliton. — /BDB (BANAT NEWS)