Bora-bora nga tambutso pangdakpon
CEBU, Philippines — Paghugtan sa Cebu City Traffic Management Coordination Committee (TMC) ang operasyon batok sa mga motorsiklong adunay saba kaayo nga tambutso human naobserbaran nga nanaghan na ang reklamo gikan sa mga residente sa nagkadaiyang lugar sa syudad bahin niini.
Matud pa sa TMC nga nagkadaghan ang mga reklamo nga nadawat sa Office of the Mayor kabahin sa mga motorsiklong adunay gitawag nga "Bora-Bora" nga muffler nga maoy hinungdan sa padayon nga kasamok ilabina sa mga residential area.
Kahinumdoman sa pipila ka bulan na ang nakalabay dihang gipangusgan ang pagsikop sa mga modified mufflers apan nakontrobersiya kini tungod sa mga reklamo kay giharos tanan og dakop basta giilisan ang tambutso.
Subay sa TMC Resolution No. 007-011-2025, ang Cebu City Transportation Office Traffic Enforcement and Operations Division (CCTO-TEOD) ang mopatuman sa balaod batok sa mga motorsiklong naggamit og “exhaust system” nga milapas sa awtorisadong mufflers o tambutso.
Palig-unon sab ang koordinasyon tali sa CCTO ug sa Land Transportation Office Region VII (LTO-7) pinaagi sa pagbansay-bansay sa mga sakop sa LTO ug mga traffic enforcer sa CCTO nga ipakatap sa kadalanan aron masiguro ang sakto ug epektibo ang pagpatuman sa mga regulasyon ug balaod.
Ubos sa kasamtangang mga ordinansa sa syudad mao ang pagdili ang pagpadagan sa mga sakyanan nga naghatag og sobra nga kasaba. Ang mga motorista nga masakpan nga naggamit og muffler nga molapas sa 84 decibels nga limitasyon mahimong silotan kun diin makamulta kini sa kantidad nga P500 hangtud P5,000 ug posible nga mapriso sulod ngadto sa unom (6) ka buwan hangtod sa usa ka tuig.
Suma pa sa TMC nga ang hugot nga pagpatuman sa balaod kabahin sa iligal nga muffler kabahin sa mas lapad nga paningkamot sa siyudad nga mapakunhod ang noise pollution, mapalambo ang kahapsay sa mga syudad ug mapaayo ang kalidad sa kinabuhi sa mga tanang lumulupyo sa syudad. IBM BANAT NEWS
- Latest
