Giimbitar og suyop, gipatay

CEBU, Philippines — Gipalawman sa kapulisan ang imbestigasyon sa pagpusil-patay sa usa ka 28-anyos nga lalaki sa Sitio Bankal, Barangay Ibabao, Cordova, alas 12:05 sa udto niadtong Dominggo, Hulyo 12, diin usa sa ilang gitan-aw nga anggulo mao ang posibleng kalambigitan sa ilegal nga drugas.

Ang biktima giila lamang sa alyas nga "Jojo," 28 anyos, residente sa Barangay Buaya, Lapu-Lapu City.

Base sa inisyal nga imbestigasyon sa Cordova Municipal Police Station, giingong giimbitar sa mga suspek ang biktima aron manuyop.

Apan samtang galakaw na ang biktima daplin sa dalan padung didto, kalit siyang gipusil sa mga suspetsado gamit ang wala pa matino nga kalibre sa armas ug dayon misibat.

Usa sa mga impormasyon nga gisusi sa kapulisan mao ang posibilidad nga adunay kalambigitan ang biktima ug ang mga suspetsado sa ilegal nga droga.

Giimbestigahan usab ang report nga gidudahan sa mga suspetsado nga police asset ang biktima human sa sunod-sunod nga pagkadakop sa ilang mga kauban.  Wala pa kini mapamatud-i ug nagpabiling kabahin sa padayong imbestigasyon.

Gidala pa ang biktima sa Carajay District Hospital sa Lapu-Lapu City apan gideklarang patay sa mga doktor.

Sa pagproseso sa crime scene, nakarekober ang mga imbestigador og usa ka bala nga wala pa matino ang kalibre nga ipadala alang sa forensic examination.

Padayon ang imbestigasyon sa kapulisan aron mailhan ang tinuod nga motibo ug madakpan ang mga responsable sa krimen. (BANAT NEWS)