Tropa, Gin Kings magbugno alang sa 2-1 nga labaw

CEBU, Philippines —  Buk-on sa defending champion TNT Tropang 5G ug Barangay Ginebra Gin Kings ang ilang panagtabla sa Game 3 sa best-of-seven PBA Season 50 Commissioner’s Cup Finals nga molabyog didto sa Mall of Asia Arena sa dakbayan sa Pasay karong adlawa (Domingo, Hunyo 7).

Sa gihapon, magsugod ang ilang sangka sa alas 7:30 sa gabii.

Ang Ginebra maoy nakauna, 102-100, salamat sa pagkamabayanihon sa import nilang si Justin Brownlee.

Apan ang Tropa dali nga nakabawos, 101-94, sa Game 2 niadtong Biyernes sa gabii didto sa Smart Araneta Coliseum sa siyudad sa Quezon luyo sa pagmangtas ni Calvin Oftana aron putlon ang ilang serye ngadto sa best-of-five. Si Oftana mipaulbo og season-high 31 puntos uban ang 10 ka rebounds.

Dako sab og naambag si Chris McCullough bitbit ang 19 puntos ug 16 ka rebounds, samtang si Jordan Heading miamot og 14 puntos aron tabangan ang TNT pagtabla sa serye.

Sila si Rey Nambatac, RR Pogoy, ug Brandon Ganuelas-Rosser mitimbre og 10 puntos matag alang sa balanseng opensiba sa TNT. Ang Tropa wala na molingi pa sukad sila mibulhot ngadto sa sayong 27-12 nga labaw, nga ila pang gipaburot ngadto sa 21 puntos.

Ang Gin Kings nakasikit ngadto na lang sa kuwatro puntos apan si Oftana mipasud og duha ka krusyal nga free throws aron paginhawaon og lawom ang Tropa uban ang sayes puntos nga bentaha, 100-94, sa pinal nga 18.7 segundos.

“Composure lang. Alam natin Ginebra will come back, NSD (never-say-die) sila. I’m happy sa team we overcame the endgame run of Ginebra,” matud pa ni Oftana.“Wala naman special motivation after the contested non-call in Game 1. Move on na kami doon. Motivated kaming lahat this game para ma-tie ang series,” dugang pa ni Oftana.