Batum miretiro na sa NBA

CEBU, Philippines — Ang French basketball star nga si Nicolas Batum mipahibawo kagahapong adlawa sa iyang pagretiro human sa 18 ka tuig niyang pagduwa sa NBA.

Si Batum, nga nakadaog og duha ka silver medals sa Olympics uban sa France, nakapakita og aksiyon sa 1,200 ka duwa sa mabulokon niyang karera.

Ang 37-anyos nga si Batum maoy No.25 overall pick sa Houston Rockets niadtong 2018 NBA Draft. Apan gi-trade dayon siya ngadto sa Portland Trail Blazers.

Gawas sa Blazer, ang 6-foot-7 forward nakasul-ot sab sa uniporme sa Charlotte Hornets, Philadelphia 76ers, ug Los Angeles Clippers diin gitapos niya ang iyang karera sa miaging season.

Si Batum gibansagan nga "Batman" tungod sa iyang kahait sa korte, kamaayo modepensa ug taas nga basketball IQ.

Mi-average siya og 9.6 puntos, 4.7 rebounds, ug 3.0 sa mabulokon niyang karera. Usa lamang siya sa pipila ka players sa kasaysayan sa NBA nga nakakulit og 10,000 puntos, 5,000 ka rebounds, ug 3,000 ka assists.