Perdido, Raagas makakasama si Kungfu Reyes sa Foxies
MANILA, Philippines — Muling makakasama nina 2026 PVL Rookie Draft No. 6 overall pick Jonna Perdido at No. 11 Ela Raagas sa Farm Fresh ang kanilang dating coach na si Kungfu Reyes.
Hinawakan ni Reyes, assistant coach ng Foxies, sina Perdido at Raagas sa University of Santo Tomas women’s at girls’ team sa UAAP, ayon sa pagkakasunod.
“Masaya po kasi ilang years din po kami nagkasama ni coach Kungfu. I think mga three years, four years, so masaya po ulit na magiging coach ko po siya ulit,” wika ni Perdido kay Reyes.
Si Raagas ay naging player ni Reyes sa UST junior high school team bago siya lumipat sa De La Salle University Lady Spikers.
Huhugot ng inspirasyon si Raagas kina dating Lady Spikers teammates Mars Alba ng Akari Chargers at Jules Tolentino ng Nxled Chameleons.
“Alam ko po lahat ng pinagdaanan nila kasi nga po naging teammates ko po sila. Siguro naging role model ko din po sila. Unti-unti, parang it’s just the beginning of a long journey,” ani Raagas.
Si Reyes ang kanang kamay ni Japanese head coach Koji Tsuzurabara sa Farm Fresh.
Samantala, tanging ang Akari lamang ang hindi pumili sa PVL Rookie Draft.
Ayon kay Chargers’ assistant coach Eddieson Orcullo, sina Camila Lamina at Detdet Pepito ang tinarget nila.
- Latest
