Batch 2013 5-0 na sa SHAABAA

CEBU, Philippines — Ang Nest Workspaces Batch 2013 milampaso sa Insular Square Batch 2005, 104-71, alang sa ikalima nilang sagunson nga daog sa Sacred Heart Ateneo Alumni Basketball Athletic Association (SHAABAA) Season 29 didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, siyudad sa Mandaue.

Si Fletcher Galvez maoy nangu sa laing balanse nga opensiba sa Batch 2013 uban ang 19 punts, unom ka rebounds ug duha ka assists.

Midugang si Jorine Cercado og 17 puntos, duha ka rebounds ug tulo ka assists samtang si Emman Malazarte miamot og 15 puntos, tulo ka rebounds, duha ka assists ug lima ka steals sa dihang gipahugtan sa Batch 2013 ang ilang pagkupot sa solong liderato sa Division B uban ang perpektong 5-0 rekord.

Si Jacob Lee mitimbre og 13 puntos ug walo ka rebounds alang sa Batch 2013, nga sa usa ka higayon miabante og 40 puntos, 104-64, sa hilimatyong segundos sa duwa.

Sa ubang mga duwa sa Division B, ang defending champion Harley Davidson Batch 2012 ug '04 For The Win Batch 2004 parehong miinat sa ilang baraha ngadto sa 4-1.

Si Dave Wilson Yu miposte og double-double nga 21 puntos ug 10 ka rebounds uban ang tulo ka assists ug duha ka steals samtang si Aaron Baldwin Sing mitampo og 15 puntos, duha ka rebounds ug duha ka assists sa dihang gipayaka sa Batch 2012 ang Batch 2006, 64-55.

Si Kylle Valmoria miharos og 28 puntos, unom ka rebounds, lima ka assists ug usa ka steal samtang si Franco Augusto Te mibubo og 21 puntos, siyam ka rebounds, pito ka assists, lima ka steals ug duha ka blocks aron ibandera ang Batch 2004 ngadto sa 100-76 nga pagbugha sa Batch 2008.

Sila si Christopher Consunji ug Jedd Ryan Go nagparamdam sab sa ilang presensiya alang sa Batch 2004 human siya nagkumboya'g 25 puntos.

Sa Division A, ang Batch 2002 mipaluhod sa 2K Cares, 66-57, alang sa una nilang daog.

Si Edmund Gaisano mikulit og 28 puntos, lima ka rebounds ug duha ka assists samtang si Ryan Li mitali og 11 puntos, tulo ka rebounds, upat ka assists ug tulo ka steals aron tabangan ang Batch 2002 pagpakgang sa tulo ka sagunson nilang pildi.