Lowry miretiro sa NBA
CEBU, Philippines — Si Kyle Lowry mituman sa iyang saad nga moretiro sa NBA isip usa ka player sa Toronto Raptors. Kini human ang 40-anyos nga point guard mipirma og usa ka adlaw nga kontrata uban sa Raptors ug dayon mi-anunsiyo sa iyang pagretiro isip sakop sa team nga iyang gitabangan paglangkat sa korona sa NBA niadtong 2019.
Nanamilit si Lowry sa ikapito nga adlaw sa ikapito nga bulan sa tuig agi'g pagtimaan sa iyang jersey No.7.
"Thank you to my family, my friends, my teammates, my coaches, my opponents, the staff, the media and especially the fans," matud pa ni Lowry, nga sa kinatibuk-an nakaduwa og 20 ka nba seasons.
"It's officially happening. I'm retiring as a Toronto Raptor -- 20 years and one day. Seven forever," dugang pa niya. Unom ka higayon nga nahimong NBA All-Star, si Lowry mitabang sa Amerika pagsakmit sa men's basketball gold niadtong 2016 Rio Olympics didto sa Brazil.
Sud sa 1,187 ka duwa sa mabulokon niyang karera uban sa Toronto, Memphis Grizzlies, Houston Rockets, Miami Heat ug Philadelphia 76ers, si Lowry mi-average og 13.8 puntos, 6.0 assists, 4.2 rebounds ug 1.3 steals matag duwa.
- Latest
