NM Roque adunay misyon sa CEPCA President's Cup 2026
CEBU, Philippines — Lab-as pa gikan sa labing uwahi niyang kalamposan, si National Master Merben Roque naglaraw nga mosakmit og laing titulo sa dihang mokumbati siya sa Cebu Executives and Professionals Chess Association (CEPCA) President's Cup 2026 karong adlawa (Sabado, Mayo 30) sa CCC Chess Club nga anaa mahimutang sa 4th floor sa Robinsons Galleria Cebu.
Si Roque, nga maoy nanghawod sa The Grandmaster Challenge:Philippine-Russian Open Chess Tournament 2026 tangkod semana na ang milabay, usa sa mga players nga pagalantawon sa usa ka adlaw nga torneyo nga magsugod sa alas 10:30 sa buntag.
Gipaabot nga mohatag ni Roque og malisud nga hagit sila si NMs Diego Abraham Caparino ug Rommel Ganzon, International Master Rico Mascarinas ug FIDE Master Anthony Makinano.
Ang kampiyon sa siyam ka hugna nga kompetisyon nga nagsilbing pahalipay ni CEPCA President Engr. Jerry Maratas sa komunidad sa chess sa Sugbo sa adlaw niyang natawhan mobulsa og P20,000 samtang ang first runner-up makadawat og P10,000.
Ang mopahiluna gikan sa ikatulo ngadto sa ikalimang dapit mokubra og P5,000, P3,000 ug P2,000 samtang ang ikaunom ngadto sa ikawalo adunay P1,000 matag usa.
Dugang niini, hatagan og insentibo nga P1,000 ug P500 ang Top 2 sa nagkadaiyang mga kategoriya (Cepcans A ug B, lady, senior, U8, U12, U16 ug U20).
- Latest
