Krog, Wangkay at Cesar lalaro sa Youth Olympics Games
MANILA, Philippines — Sasalang sina cyclist Maritanya Krog at tracksters Pi Durden Wangkay at Naomi Marjorie Cesar sa 4th Youth Olympics Games sa Senegal sa Oktubre.
Ito ang inihayag kahapon ni Philippine Olympic Committee (POC) president Abraham “Bambol” Tolentino kasabay ng paglulunsad sa Philippine National Speed Cubing Open 2026 sa Tagaytay City Combat Sports Center katuwang ang Asian Mind Sports Association.
“They have been nominated by their respective national sports associations (NSAs) and we’re awaiting six more nominations,” sabi ni Tolentino.
Sina Krog, Wangkay at Cesar ay tatlo sa siyam na batang atletang isasabak ng POC sa YOG na nakatakda sa Oktubre 31 hanggang Nobyembre 13.
Nagbigay ang International Olympic Committee—nag-oorganisa sa quadrennial YOG—sa Pilipinas ng siyam na Universality Places.
Ito ay tig-isang lalaki at babae sa athletics, isang woman cyclist para sa road at individual time trial, tig-isang lalaki at babae sa artistic gymnastics, isang lalaki sa windsurfing, isa sa women’s taijiquan combined sa wushu, isa sa men’s 100 meters butterfly at isa sa women’s 100 meters breaststroke sa swimming.
Ang YOG ay para sa mga batang atletang may edad na 15-anyos hanggang 18-anyos.
Nanomina ang 17-anyos na si Krog base sa kanyang sixth-place finish sa Asian Youth Games sa Bahrain bukod sa panalo ng mga gold medals sa Batang Pinoy at National Cycling Championships at paglahok sa women’s elimination race ng Asian Cycling Confederation Track Championships sa Tagaytay CT Velodrome.
Wagi naman ang 17-anyos ding si Wangkay sa men’s 200 meters at sumegunda si Cesar sa girls’ 800 meters sa 2025 Asian Youth Games sa Bahrain.
- Latest
