Belano, Yap nanghawod sa Cebu Checkmate 2026

CEBU, Philippines — Sila si John Lester Belano sa Mandaue City Comprehensive National High School ug Anton Matteo Yap sa Singapore School of Cebu gikoronahang mga kampiyon sa malampuson nga Checkmate Cebu 2026 chess tournament niadtong Sabado, Mayo 16, sa Robinsons Galleria Cebu.

Si Belano ang nanghawod sa juniors division (20 Under) samtang si Yap milangkat sa korona sa 16 Under ning usa ka adlaw nga torneyo nga giorganisa ni International Master Kim Steven Yap sa Cebu School of Chess inabagan sa Singapore School of Cebu.

Nag-triple tie sila si Belano, Zephyrr Kyle Abalo ug Reduard Contaoi sa Luray II National High School da dakbayan sa Toledo uban ang managsamang 7.0 puntos apan si Belano ang miangkon sa unang dapit nga nagtangag og P12,000 nga ganti kortesiya sa mas taas niyang tiebreaker.

Si Abalo mibulsa og P8,000 sa pagpahiluna niya sa ikaduhang puwesto samtang si Contaoi nakadawat og P6,000 isip 3rd.

Sila si Edelyn Vosotros sa University of Cebu ug Triton Blue Ares Garcia sa Cebu Sacred Heart College Inc. ang mikokupar sa ikaupat ug ikalimang luna uban ang 6.5 puntos matag usa.

Naglangkob sa Top 10 bitbit ang parehong 6.0 puntos mao sila si Rey Gabriel Dalapo, John Dave Lavandero, Sean Kenneth Cogonon, Maria Kristine Lavandero, ug Tyler Francisco.

Sa 16 Under, si Yap ang misakmit sa titulo uban ang 5.5 puntos. Mikubra siya og P5,000 nga premyo.

Sila si Sven Lucas Poster sa Academia De Nuestra Señora-Ronda, Aresmith Pasaol sa Carmen Elementary School ug Jhon Garvey Fuertes parehong mi-iskor og 5.0 puntos apan si Poster ang mikabi sa P4,000 nga premyo alang sa ikaduhang dapit tungod sa mas dako niyang tiebreaker.

Si Poster mikolekta og P4,000 samtang si Pasaol mibibit og P3,000 sa paglandig niya sa ikatulong dapit. Si Fuertes mitapos nga ikaupat.

Nasud sa Top 10 sila si Zane Anthon Francisco, Xyril Angelo Ocampo, Ding Yu Wang, Miles Allen Cadavero, Dominic Lucas Olegario, ug Frech Montalban.

Sa laing bahin, ang University of Cebu ug Singapore School of Cebu gibayaw nga top performing schools samtang ang mga best players sa ilang mga kategoriya mao sila si Apple Rubin ug Thea Bernice Otto (female), Job Elohim Bongaitan ug Arthur Rafael Go (U8), Heinrich Golpeo ug Kyle Mason Co (U10), John Patrick Rabor ug Derrick Gabe Leones (U12), Aarav Kale (U14), Glenn Earl Rojo (U16), ug Gyeol Han (SSC).

Ang maong kalihukan nahimong posible tungod sa suporta nila ni Boojie Lim sa Chess Infinitum, John Signe sa Toledo-Xignex Trojans, Kelly Uy sa Progress Marketing, Engr. Jerry Maratas sa Cebu Executives and Professionals Chess Association (CEPCA), Engr. Roy de la Cruz of the Philippine Institute of Civil Engineers (PICE), Dr. Edwin Cablao. Hector Ginete, ug Jojo Legaspi.