E-Painters midaog bisa'g way import, 3-0 na

CEBU, Philippines —  Ang Rain or Shine miasdang sa korte nga walay import gumikan kay si Jaylen Johnson nagsilbi sa usa ka duwa niyang suspensiyon.

Apan wala kini nahimong problema sa Elasto Painters gumikan kay ila gihapong gipayaka ang Meralco Bolts, 109-102, aron inaton ang perpekto nilang sinugdanan ngadto sa 3-0 sa PBA Commissioner’s Cup niadtong Biyernes sa gabii didto sa Smart Araneta Coliseum.

Si Felix Lemetti maoy nangu sa balanseng ataki sa Elasto Painters uban ang 23 puntos.

Si Adrian Nocum mihipos og 17 puntos, ug unom ka rebounds, si Caelan Tiongson mi-iskor og 16,

si Jhonard Clarito mitampo 15 puntos ug siyam ka rebounds samtang si Christian Manaytay mikimada og 12 puntos alang sa Rain or Shine, nga miposte og 17 puntos nga bentaha, 45-28, sa saying bahin.

Ang Bolts igo lamang nakasikit ngadto sa usa ka lugas, 94-95, gumikan kay sila si Lemetti, Clarito, Nocum ug Luis Villegas nagtambayayong aron paburoton og balik ang labaw sa E-Painters ngadto sa 11 puntos, 108-97, sa pinal nga 72 segundos.

Si Chris Newsome mipabuto og 29 puntos samtang ang import nga si Marvin Jones mihipos og 17 puntos ug 16 ka rebounds alang sa Bolts, nga naparot sa unang higayon sud sa tulo ka duwa.

Sa laing bahin, ang NLEX Road Warriors nakabawi human maalkansi og 13 puntos aron patikalbongon ang Barangay Ginebra Kings, 118-113.

Si Robert Bolick ang bida sa NLEX uban ang 32 puntos.

Dako sab og naambag si Cady Lalanne nga miharos og 28 puntos ug 14 ka rebounds ingon man si Schonny Winston nga mitali og 21 puntos alang sa NLEX, nga nagkupot na karon og 3-1 nga baraha.

Si Justin Brownlee mipaulbo og 46 puntos apan wala mosaler ang ekspolsibo niyang salida gumikan kay napukan ang Ginebra sa unang higayon.