Cheetahs nakabawos sa Jaguars

CEBU, Philippines — Ang Benedicto College (BC) Cheetahs miresbak sa University of San Jose-Recoletos (USJ-R) Jaguars, 76-64, aron pagpabilin sa kinatas-ang dapit sa college division standings sa Cebu Schools Athletic Foundation, Inc. (CESAFI) Season 26 basketball tournament niadtong Sabado sa gabii sa Cebu Coliseum.

Si Jhon Loufred Diamante mikadlit og 16 puntos, samtang si Kenneth Babalcon mipupo og 12 puntos, upat ka rebounds, walo ka assists, tulo ka blocks ug usa ka steal sa dihang ang Cheetahs miinat sa labing nindot nilang rekord sa liga ngadto sa 9-1.

Midugang si Junil Bulan og 11 puntos, unom ka rebounds, duha ka assists, usa ka steal ug usa ka block alang sa Cheetahs, nga nakabawos sa 60-62 nilang kaparotan sa overtime ngadto sa Jaguars sa unang hugna niadtong Septyemre 24.

Si Alcher Obra mirehistro of double-double nga 16 puntos ug 11 ka rebounds uban ang duha ka steals, samtang si El John Lacaya miamot og 12 puntos, duha ka rebounds, lima ka assists ug tulo ka steals apan nakawang ang ilang paninglamot kay ang Jaguars natagak sa 5-4.

Sa laing collegiate matchup, si Ray James Enriquez miharos og 21 puntos, upat ka rebounds, tulo ka assists ug duha ka steals sa dihang ang University of San Carlos (USC) Warriors nakabawos sa University of Cebu (UC) Webmasters og usa lamang ka lugas, 59-58.

Si Real Einer Aureo mitali og 13 puntos uban ang pito ka rebounds, duha ka assists ug duha ka blocks, samtang si James Tawacal mitampo og 10 puntos, unom ka rebounds ug tulo ka assists alang sa Warriors nga nagkupot na karon og 6-4 nga baraha.

Mipabuto si Ricofer Sordilla og 18 puntos, upat ka rebounds, lima ka assists ug usa ka steal, samtang si  Maverick Eligoyo miposte og 17 puntos, tulo ka rebounds, duha ka assists ug usa ka steals apan nangahoyhoy ang ilang abaga kay ang Webmasters nahagsa sa 5-5.

Sa juniors division, ang reigning five-peat champions Sacred Heart School-Ateneo de Cebu (SHS-AdC) Magis Eagles ug ang University of Cebu Lapu-Lapu and Mandaue (UCLM) nagpabiling way pildi.

Si Lian Kent Basa mikolekta og 13 puntos, pito ka rebounds, pito ka assists ug unom ka steals, samtang sila si Jacob Javelosa ug Gabriel Gonzales milansang og 13 puntos matag usa sa dihang ang Magis Eagles milupad sa ikaunom nilang sagunson nga daog uban ang 67-56 nga pagpakaging sa Cebu Eastern College (CEC) Dragons.

Si Carl Torreon mibirada og 18 puntos, samtang si Kyle Francis Bayog mitimbre og 11 puntos, duha ka rebounds, lima ka assists ug duha ka steals sa dihang ang UCLM mipatigbabaw sa UC Junior Webmasters, 79-61, alang sa ikapito nilang sunod-sunod nga daog.

Sa laing duwa, si Skeril Miez Basilisco mihipos og 14 puntos ug walo ka rebounds, samtang si Mark Ivan Geraldez adunay 12 puntos, upat ka rebounds ug lima ka assists sa dihang ang Cebu Institute of Technology-University (CIT-U) Junior Wildcats nakaipsot sa University of Southern Philippines Foundation (USPF) Baby Panthers, 61-59, aron paglayat sa ikaduhang puwesto bitbit ang 7-2 nga baraha.