TNT, Blackwater mikadlit sa una nilang daog

CEBU, Philippines — Ang TNT Tropang 5G dali nga nakabawi sa miagi nilang kapildihan human gipayaka ang NLEX  Road Warriors, 103-97, sa PBA Season 50 Commissioner’s Cup niadtong Domingo, Marso 21, didto sa Ynares Sports Center sa Antipolo.

Ang higanteng import nga si Bol Bol maoy nangu sa buena manong daog sa Tropa uban ang 40 puntos ug 15 ka rebounds.

Nakakuha hinoon si Bol og dakong suporta gikan sa lokal niyang mga kauban.

Si Jordan Heading mihipos og 15 puntos, upat ka assists, upat ka steals ug duha ka rebounds samtang sila si Calvin Oftana ug Brandon Ganuelas-Rosser parehong miposte og 14 puntos ug upat ka rebounds.

Si Cady Lalanne miharos og 25 puntos ug 21 ka rebounds apan wala mosaler ang impresibo niyang salida ning higayona gumikan kay naputol ang duha ka sagunson nga daog sa NLEX.

Sa laing duwa, sila si Sedrick Barefield ug Robert Upshaw mikawat og atensiyon sa dihang gipakaging sa Blackwater Bossing ang Magnolia Hotshots, 97-91, alang sa una nilang daog.

Si Upshaw, nga maoy mihulip sa na-injured nga si Daniel Ochefu, mihimo dayon og kasikas sa una niyang duwa uban sa Blackwater pinaagi sa pagkolekta og 35 puntos, 13 ka rebounds, unom ka assists ug tulo ka blocks.

Ang 4-pointer ni Upshaw nakapaginhawa og lawom sa Blackwater uban ang 91-84 nga labaw sa pinal nga 58.6 segundos.

Wala sab magpabitin si Barefield, nga mibubo og 22 sa iyang 26 puntos sa second half nga nakatabang sa Bossing pagwani sa Hotshots, 30-19, sa katapusang kuwarter.

Si Nuni Omot mipabuto og 38 puntos samtang sila si Zavier Lucero ug Ian Sangalang nagkumboya'g 27 puntos apang nakawang ang ilang paningkamot gumikan kay ang Hothosts nagpabiling bokya human sa tulo ka duwa.