Yulo nakatutok sa LA at Brisbane Olympics
MANILA, Philippines — Puno na ang kaban ni Paris Olympics gold medalist Carlos Yulo ng kaliwa’t kanang tagumpay mula sa iba’t ibang malalaking torneong nilahukan nito.
Maraming beses na itong nagbigay ng karangalan sa bansa — mula sa Southeast Asian Games, Asian Championships, World Championships ay Olympic Games.
Subalit wala pang balak huminto si Yulo.
Nais nitong magpatuloy sa pagbibigay ng karangalan sa bansa.
Partikular na tinututukan nito ang 2028 Olympic Games sa Los Angeles, California kung saan dalawang korona ang ipagtatanggol nito.
“Marami pa po akong gustong ma-achieve. Hindi pa po natatapos ‘yung journey ko. Meron pang LA Olympics. After that hindi ko pa po alam if tutuloy pa po ako,” ani Yulo.
Matapos ang LA Olympics, tiwala si Yulo na makakaabot pa ito sa 2032 Brisbane Olympics.
“Pero I can see na kaya kong abutin ‘yung 2032 Olympics,” ani Yulo.
Umaasa lang si Yulo na maging healthy ito sa bawat laban nito gayundin sa pukpukang ensayo upang maiwasan ang anumang injury.
“I’m just really praying na maging safe ako parati sa lahat ng competitions ko and training ko,” dagdag ni Yulo.
Masaya si Yulo sa tagumpay ng mga Pilipino sa international scenes.
Kabilang na rito si Alex Eala na co-Athlete of the Year nito sa katatapos na PSA Annual Awards Night.
Bakasyon muna si Yulo kasama ang kasintahang si Chloe.
- Latest
