Ramos sabak kaagad sa Gilas training
MANILA, Philippines — Walang pahi-pahinga para kay Dwight Ramos na sumali agad sa ensayo ng Gilas Pilipinas matapos ang kampanya sa Japan B. League bilang preparasyon ng koponan sa papalapit na second window ng 2027 FIBA World Cup Asian Qualifiers sa Pebrero 26 hanggang Marso 1.
Si Ramos ng Levanga Hokkaido ang pinakabagong dagdag sa training camp ng Gilas na lumipat na closed-door venue sa Inspire Sports Academy sa Calamba, Laguna mula sa Upper Deck Sports Center sa Pasig City.
Kagagaling lang ni Ramos at ng Hokkaido sa 93-115 kabiguan kontra sa dati niyang koponan na Toyama Grouses.
Sinamahan ni Ramos sa ensayo sina PBA players Justine Baltazar at Juan Gomez de Liaño, ng Converge, June Mar Fajardo at CJ Perez ng San Miguel, Chris Newsome ng Meralco, Calvin Oftana ng TNT, Scottie Thompson, RJ Abarrientos, Troy Rosario at naturalized player Justin Brownlee ng Ginebra.
Naghahanda ang Gilas para sa road games kontra sa New Zealand at Australia sa Pebrero 26 at Marso 1, ayon sa pagkakasunod, matapos walisin ang first window kontra sa Guam.
Kasalo ng Gilas sa tuktok ng Group A ang Australia hawak ang parehong 0-2 kartada kasunod ang mga kulelat na Guam at New Zealand na may 0-2 marka.
Inaasahang dumating na rin ngayong linggo ang iba pang Asian imports sa Japan B. League at Korean Basketball League na sina AJ Edu, Carl Tamayo at Kevin Quiambao.
- Latest
