Acosta bumandera sa Junior Altas vs Lady Brigadiers

MANILA, Philippines — Idiniretso ng University of Perpetual Help System DALTA sa tatlo ang kanilang arangkada matapos ang 18-25, 25-19, 25-19 pagresbak sa Emilio Aguinaldo College sa NCAA Season 101 girls’ volleyball tournament kahapon sa Arellano Gym sa Pasay City,

Pumalo si Grade 11 Sherrie Rose Acosta ng 16 points mula sa 15 attacks at isang block para sa 3-0 kartada ng Junior Lady Altas ni coach Sandy Rieta.

Nagdagdag si Joycelle Casil ng 12 makers mula sa siyam na attacks, isang block at dalawang service aces at may 19 excellent sets si setter Jasmine Monte.

Pinamunuan ni Apple Joy Clapero ang Junior Lady Brigadiers sa kanyang 13 points buhat sa 10 attacks at tatlong blocks.

Kinuha ng EAC ang first set sa pagbibida ni Clapero bago ibinangon nina Acosta at Casil ang Perpetual Help sa sumunod na dalawang sets para agawin ang panalo.

Sa boys’ division, tinalo ng EAC Brigadiers ang Lyceum of the Philippines Junior Pirates-Cavite, 25-20, 22-25, 25-23, 25-18, habang dinaig ng Mapua University Red Robins ang Colegio de San Juan de Letran Junior Knights, 25-23, 20-25, 25-22, 25-21.

Wagi naman ang Arellano University Braves laban sa San Sebastian College-Recoletos Staglets, 25-20, 25-16, 25-20.