Cool Smashers may 'target' sa likod

MANILA, Philippines — Hindi pa man nagsisimula ang 2026 Premier Volleyball League All-Filipino Conference ay may target na kaagad sa likod ng Creamline.

Nagkakaisa ang siyam pang PVL teams na "team to beat" ang Cool Smashers dahil sa pagbabalik nina eight-time league Best Setter Jia de Guzman at dating PVL MVP Bernadeth Pons.

Nahugot din ng 10-time PVL champions si veteran libero Jen Nierva mula sa nabuwag nang Chery Tiggo.

“I think siguro ‘yung pinaka-excited kami makalaban ‘yung team muna namin,” ani Cignal coach Shaq Delos Santos. “Kailangan ma-overcome muna namin lahat ng mga challenges, but to be honest—PLDT, Creamline, Akari, Choco—lahat talaga. Kung makikita niyo naman ‘yung lineups, ang laki ng mga changes.”

“Agree ako kay coach Shaq saka kay (Creamline) coach Sherwin (Meneses), sarili muna tapos Creamline,” sabi naman ni PLDT mentor Rald Ricafort.

Tatlong taon nawala si De Guzman sa Creamline matapos maglaro sa Japan S.V. League para sa Denso Airybees.

Hindi rin naglaro si Pons para sa 10-time PVL champions sa 2025 PVL On Tour, Invitational at Reinforced Conference dahil sa kanyang Gilas Pilipinas beach volleyball duties.

Unang makakalaban ng Cool Smashers ang High Speed Hitters sa Pebrero 5 sa Filoil Centre sa San Juan City.