Bulls misungag sa sixers

CEBU, Philippines —  Si Coby White mibubo og siyam sa iyang 13 puntos sa katapusang kuwarter aron ituboy ang Chicago Bulls ngadto sa 109-102 nga pagpakaging sa Philadelphia 76ers sa NBA kagahapong adlawa didto sa United Center sa Chicago, Illinois.

Sila si Tre Jones ug Zach Collins mitali og 15 puntos matag usa samtang si White midugang og pito ka rebounds ug unom ka assists alang sa Bulls, nga mi-iskor sa katapusang 10 puntos sa duwa aron bughaon ang Sixers ug tablahon ang ilang rekord ngadto sa 15-15.

Si Joel Embiid miharos og 31 puntos samtang si Tyrese Maxey mibirada og 27 puntos apan parehong nangahoyhoy ang ilang abaga gumikan kay ang Sixers nahagba na sab sa mga kamot sa Bulls.

Didto sa Utah, si Keyonte George mipasud sa iyang jump shot sa pinal nga 2.1 segundos aron aswaton ang Jazz ngadto sa 131-129 nga pagpakurat sa inilog nga Detroit Pistons.

Si George mipupo og 31 puntos samtang si Lauri Markkanen midugang og 30 puntos alang sa Jazz, nga nagkupot na karon og 11-19 nga baraha human gipakgang ang upat ka sagunson nilang pilde.

Si Cade Cunningham mikolekta og 29 puntos ug 17 assists apan wala mosaler ang maanindot niyang salida kay naputol ang tulo ka sagunson nga daog sa Pistons.

Didto sa Indianapolis, sila si Jaylen Brown ug Payton Pritchard nagkumboya'g 59 puntos aron pangulohan ang

Boston Celtics ngadto sa 140-122 nga pagpatikalbong sa Indiana Pacers.

Dako sab og naambag si Sam Hauser nga mikimada og 23 puntos alang sa Celtics, nga nagtangag na karon og 19-11 rekord human nakasagunson og upat ka daog.

Samtang ang nagkagidlay nga Pacers misukarap sa ikapitong sunod-sunod nga higayon og natagak sa 6-25.

Sa ubang mga results, ang Washington Wizards miparot sa Toronto Raptors, 138-117, ang Miami Heat mipaksit sa Atlanta Hawks, 126-111, ang Phoenix Suns mibugha sa New Orleans Pelicans, 115-108, ang Chalotte Hornets miparot sa Orlando Magic, 120-105, samtang ang Memphis Grizzlies mipiog sa Milwaukee Bucks, 125-104.