Mojdeh babanat ng medal sa SEA Games
MANILA, Philippines — Handa na ulit lumaban si Micaela Jasmine Mojdeh upang sumungkit ng medalya sa 2025 Southeast Asian Games na ginaganap sa Sports Authority of Thailand swimming pool sa Bangkok, Thailand.
Nagkasakit si Mojdeh sa ikaapat na araw ng kumpetisyon dahilan upang hindi na ito lumaban pa sa finals ng women’s 100m butterfly noong Sabado.
Umaga pa lang ay hindi na maganda ang pakiramdam ni Mojdeh subalit pinilit pa rin nito na sumabak sa preliminary round kung saan pumanlima ito para makapasok sa finals.
Subalit nagdesisyon ang pamunuan ng Philippine Aquatics Inc. na hindi na sumabak pa si Mojdeh sa evening finals upang makapagpahinga na muna para sa kanyang susunod na event.
“This is to inform that Jasmine Mojdeh has withdrawn from the 100m butterfly finals. It has been decided in consideration of her health. The withdrawl is due to flu and fever. We wish her a speedy recovery as she focuses on improving her physical condition,” ayon sa statement ng PAI.
Buong araw na nagpahinga si Mojdeh ng Linggo kaya’t mabilis itong nakarekober.
Kaya naman handang-handa na itong muling sumabak para sa finals ng 4x100m medley relay.
Makakasama ni Mojdeh sa relay sina Olympian Kayla Sanchez, 2023 SEA Games champion Xiandi Chua at veteran breaststroker Miranda Renner.
Sa kasalukuyan, humakot na si Sanchez ng tatlong gintong medalya kasama pa ang dalawang pilak na medalya para maging most bemedalled Pinoy athlete sa SEA Games.
Nagreyna si Sanchez sa 100m freestyle at 100m backstroke habang naka-ginto rin ito sa 4x100m freestyle relay kasama sina Chua, Heather White at Chloe Isleta.
May pilak naman si Sanchez sa 200m freestyle at 50m backstroke events.
Sa kabilang banda, nakahirit din si White ng pilak sa 100m freestyle habang may pilak din si Chua sa 200m backstroke.
Sa men’s division, tanging si Gian Christopher Santos pa lamang ang may medalya nang makapilak ito sa 200m Individual Medley event.
- Latest
