CAVS isinalba ni Mitchell
CLEVELAND - Kumamada si Donovan Mitchell ng walong sunod na puntos sa loob ng 65 segundo, kasama ang go-ahead basket sa natitirang 34 segundo, sa 128-122 pagtuhog ng Cavaliers sa Chicago Bulls.
Tumapos si Mitchell na may 29 points kasama ang 26 markers sa second half kung saan niya ibinangon ang Cleveland (7-3) mula sa isang 19-point deficit.
Nagdagdag si De’Andre Hunter ng season-high 29 points kasunod ang 24 markers ni center Evan Mobley.
Pinangunahan ni Isaac Okoro ang Chicago (6-3) sa kanyang 19 points habang naglista si Jalen Smith ng 18 points at 11 rebounds.
Ang dunk ni Josh Giddey ang nagbigay sa Bulls ng 72-53 bentahe sa dulo ng second quarter bago umarangkada si Mitchell sa second half para tulungan ang Cavaliers na manalo.
Sa Philadelphia, bumanat si Tyrese Maxey ng 31 points kasunod ang 29 markers ni Joel Embiid sa 130-120 pagdaig ng 76ers (6-3) sa Toronto Raptors (5-5).
Kumolekta si Trendon Watford ng triple-double na 20 points, 17 rebounds at 10 assists para sa unang panalo ng Philadelphia sa pang-lima nilang pagtutuos ng Toronto simula noong nakaraang season.
Sa iba pang laro, nirapido ng Denver Nuggets ang Indiana Pacers, 117-110, panalo ang Atlanta Hawks sa Los Angeles Lakers, 122-102; tinalo ng San Antonio Spurs ang New Orleans Pelicans, 126-119; at sinunog ng Miami Heat ang Portland Trail Blazers, 136-131.
- Latest
