Alas papalag sa Tunisia
FIVB Men’s World Championship hahataw na
MANILA, Philippines — Papalagan ng Alas Pilipinas ang Tunisia sa kanilang duwelo sa pagbubukas ng 2025 FIVB Volleyball Men’s World Championship sa Mall of Asia Arena sa Pasay City.
Lalabanan ng Alas Pilipinas ang Tunisia ngayong alas-7 ng gabi sa Pool A matapos ang opening ceremony tampok ang K-pop group BOYNEXTDOOR sa alas-4:30 ng hapon.
Magkakasama sa Pool A ang World No. 82 Pilipinas, No. 42 Tunisia, No. 13 Iran at reigning African champion at No. 23 Egypt.
Sasagupain ng mga Pinoy spikers ang mga Iranians sa Setyembre 16 sa alas-5:30 ng hapon kasunod ang mga Egyptians sa Setyembre 18 sa alas-5:30 ng hapon sa parehong Pasay City venue.
Isasalang ni Italian champion coach Angiolino Frigoni sina Bryan Bagunas, Marck Espejo, Leo Ordiales, Michaelo Buddin, Jade Disquitado, Louie Ramirez, Kim Malabunga, Peng Taguibolos, Lloyd Josafat, Josh Ybañez, Jack Kalingking, Vince Lorenzo, Owa Retamar at Eco Adajar.
Hindi maglalaro para sa Tunisia si star spiker Wassim Ben Tara, ngunit sasandal kina veteran aces Hamza Nagga at Elyes Karamosli sa 32-team world championships.
Kasama ng defending champion Italy sa Pool F ang Ukraine, Belgium at Algeria; ang Pool G ay kinabibilangan ng Japan, Canada at Turkey at nasa Pool H ang Brazil, Serbia, Czechia at China.
Binubuo naman ang Pool B ng World No. 1 Poland, Netherlands, Qatar at Romania, habang magkakasama sa Pool C ang reigning Olympic champion France, Argentina, Finland at Korea.
Ang Pool D ay kinabibilangan ng United States, Cuba, Portugal at Colombia; samantalang maghaharap sa Pool E ang Slovenia, Germany, Bulgaria at Chile.
- Latest
