Cebu Greats gilatigo sa Isabela Cowboys
CEBU, Philippines — Napakyas ang Cebu Greats sa ilang tinguha nga makasagunson og daog human sila gilampornas sa Ilagan Isabela Cowboys, 66-80, sa Manny Pacquiao presents 1xBet-Maharlika Pilipinas Basketball League (MPBL) 2025 Season niadtong Huybes sa gabii, Hulyo 17, didto sa San Andres Sports Complex sa kaulohan.
Ang Cebu miabante og otso puntos, 16-8, human sa unang kuwarter apan ang Cowboys dali nga miresbak aron ilogon ang labaw, 35-30, sa halftime, nga ilang namintinar, 50-45, padung sa pinal nga 10 minutos.
Ang Greats anaa sa duol nga distansiya sa katapusang higayon sa iskor nga 48-54 gumikan kay ang Cowboys milusad og bangis nga ataki, 23-9, aron paburoton ang ilang bentaha ngadto sa 20 puntos, 77-57, sa 3-pointer ni Mark Dyke sa nahibilin nga 2:47 sa duwa.
Si Jayboy Solis mikadlit og 12 puntos samtang sila si Dyke ug Joshua Guiab parehong mi-iskor og 11 puntos alang sa Cowboys, nga ika-15 karon sa standings uban ang 11-8 win-loss rekord. Si Jun Manzo mipabuto og 28 puntos apan nakawang ang impresibo niyang salida gumikan kay ang Cebu nakatilaw sa ika-15 niining pilde nga giatbangan og lima pa lamang ka daog.
- Latest
