La Salle handa sa NU sa UAAP Finals
MANILA, Philippines — Pareho ang nakatatak sa isip nina Angel Canino at Bella Belen, ito ay ang masungkit agad ang panalo sa Game One Finals ng UAAP Season 87 women’s volleyball tournament na lalaruin bukas sa Smart Araneta Coliseum.
Dating Rookie/MVP awardees sina Canino (Season 85) at Belen (Season 84), pambato ng De La Salle University ang una, habang panargo ng defending champion National University ang huli.
Magsisimula ang best-of-three title series ng Lady Spikers at Lady Bulldogs sa alas-5 ng hapon.
Nais ni Canino at ng La Salle na maibalik ang korona sa kanilang bakuran kaya asahang ibubuhos nila ang kanilang lakas para matupad ito.
Sokpa sa kanilang ika-21 finals appearance ang Taft-based squad matapos magtala ang 21-anyos at tubong Bacolod City na si Canino ng 19 points nang patalsikin ang University of Sto. Tomas sa Final Four.
Nasungkit ng Lady Spikers ang pang-12 titulo sa 85th season nang kadenahin nila ang Lady Bulldogs.
“Happy kasi slow start eh, ang tagal makapag-adjust, eventually nagpaikot kaagad ako ng setter so nakita ko naman na nag-work naman, marami pa kaming dapat ayusin,” sabi ni La Salle coach Ramil de Jesus na aasa rin kina Amie Provido, Shevana Laput, Alleiah Malaluan, Lyka De Leon at ace playmaker Mikelo Reyes.
- Latest
