Jokic mihimo'g kasaysayan

CEBu, Philippines —  Nuggets milansang og krusyal nga daog vs Grizzlies

Si Nikola Jokic mipupo na sab og triple-double sa dihang gipalig-on sa Denver Nuggets ang ilang posisyon sa NBA plaoffs human gibuntog ang Memphis Grizzlies, 117-109, kagahapong adlawa didto sa Ball Arena sa Denver, Colorado.

Ang three-time MVP gikan sa Serbia mirehistro og 26 puntos, 13 ka assists ug 16 ka rebounds sa ika-34 niyang triple-double ning season,

Tungod niini, si Jokic garantisado na nga mamahimong ikatulo pa lamang nga player sa kasaysayan sa NBA nga mi-average og triple-double sa tibuok regular season sunod nilang Oscar Robertson ug Russell Westbrook.

Bitbit ang 49-32 rekord, ang Nuggets dako'g tsansa nga moangkon sa ikaupat nga puwesto sa Western Conference nga dunay homecourt advantage sa playoffs.

Samtang ang Grizzlies natagak sa 47-34.

Sa laing bahin, ang Los Angeles Lakers misilyo sa No.3 seed sa West human sa 140-109 nilang demolisyon sa Houston Rockets, nga segurado nang No.2 seed.

Ang Warriors, nga milampornas sa Portland Trail Blazers, 103-86, ikaunom karon sa West. Ang Oklahoma City Thunder, nga misakmit na sa No.1 seed sa ilang komperensiya, yanong mikastigo sa Utah Jazz, 145-111.

Sa East, ang Cleveland Cavaliers, nga maoy nay top seed, mipakaging sa No.3 seed New York Knicks, 108-102.

Nakuha sa Knicks ang ikatulong puwesto sa dihang ang Indiana Pacers gipilde sa Orlando Magic, 129-115.

Ang second seed nga Boston Celtics mikolekta sa ika-60 nilang daog ning season human gilampaso ang Charlotte Hornets, 130-94, samtang ang New Orleans Pelicans nakatilaw sa labing pait nga kapildihan sa kasaysayan sa ilang prankisa human sila gikulata sa Miami Heat, 153-104.