Unang Alegado Cup pickleball tournament nagmalampuson

CEBU, Philippines — Ang pickleball naapil sa unang higayon sa 16 ka tuig nga kasaysayan sa Alegado Cup ug malampuson kaayo kini.

Nakasinati ang mga taga-Consolacion og hugot apan makalingaw nga kompetisyon ning paspas nga misikat nga paugnat sa kusog pinaagi sa 1st Mayor Nene Alegado Fiesta Pickleball Tournament nga gipahigayon bag-ohay lang sa Paduwa Pickleball Club nga gipanag-iya ni Neil Maglasang.

Ang lead organizer nga si Carlos Donn Flores nagkanayon nga nahimong posible ang maong torneyo tungod sa hingpit nga suporta ni Consolacion Mayor Teresa “Nene” Alegado ug Vice Mayor Joannes “Joyjoy” Alegado inabagan nilang Association of Barangay Councils (ABC) President Wesley Alimoren, Sangguniang Kabataan (SK) Federation President Shella Carpina, Sports Commissioner Paul Alelu Flores, ug ubang mga opisyal sa lungsod.

Gipadayag ni Flores ang iyang garbo ug pasalamat sa higayon nga gipiyal kaniya pag-organisar sa maong kalihokan. Matod pa niya, sinugdanan pa lamang kini sa mas daghan ug mas sadya nga mga kalihokan sa pickleball sa Consolacion.

"Behind every successful event are people who willingly work behind the scenes, and we are grateful for every single one of you!" dason pa ni Flores sa iyang post sa Facebook.

"To everyone who became part of the 1st Mayor Nene Alegado Fiesta Pickleball Tournament, whether you helped organize, officiate, compete, volunteer or support from the sidelines, daghan kaayong salamat!" dugang ni Flores, nga gitabangan ni technical head Engr. Von Jovi Reuyan Oporto pagpadagan sa mga duwa.

Sa laing bahin, sila si Gelovie Dalaniel ug Geralde Romer sa Barangay Nangka maoy nakampiyon sa 24-Under men's doubles, sila si Kyra Chloie Famador ug Liane Valerie Miñoza sa Cabangahan misakmit sa women's doubles title, samtang sila si Devie Jane Gillaco ug Judgesam Tumabini sa Nangka ang nanghawod sa mixed doubles.

Laing pares gikan sa Nangka nga sila si Jude Carlo Balundo ug Zudie Karl Balundo ang milangkat sa korona sa 25+ men's doubles. Sila si Maria Cecilia Go ug Lynde Rondina sa Jugan ang rayna sa women's division, samtang sila si  Dwight Alvio ug Emily Rhea Judilla sa Panas ang mipahiluna sa unang dapit sa mixed doubles.

Sa ABC/SK category, sila si Mark Madjos ug Anthony Alinsug sa Pitogo ang naghari sa men's doubles, sila si Nicole Montalla ug Ashley Bontilao sa Panoypoy ang mipatigbabaw sa women's doubles, samtang sila si Licero "Boy" Dumadag ug Julianne Ybañez sa Jugan maoy midominar sa mixed doubles.