Fajardo, Tuadles pasidunggan
Naapil sa listahan sa PBA 50 Greatest Players
CEBU, Philippines — Ang mga garbo sa Sugbo nga sila si June Mar Fajardo ug anhing Arnie Tuadles ug ang lain pang walo sa labing bag-ong mga gidugang nga nagkumpleto sa listahan sa 50 Greatest Players sa kasaysayan sa PBA gikatakdang pasidunggan sa usa ka pormal nga seremonyas karong adlawa (Biyernes, Abril 11) didto sa Solaire Resort North sa Quezon City.
Sila si Fajardo ug Tuadles naapil sa pinili nga grupo sa liga kauban silang Scottie Thompson, Nelson Asaytono, Bong Hawkins, Jeffrey Cariaso, Danny Seigle, Abe King, Elpidio Villamin ug Manny Victorino.
Si Fajardo, ang 6'10" nga higante gikan sa lungsod sa Pinamungajan, nagkupot og rekord nga walo ka MVP awards nga nagdayan-dayan sa 10 niya ka korona sa kampiyonato.
Usa ka four-time Finals MVP ug nine-time All-Star, ang labing hait nga produkto sa University of Cebu (UC) Webmasters nakakolekta og 11 ka tropeyo isip Best Player of the Conference (BPC) samtang naapil sa Mythical First Team siyam ka higayon ug sa All-Defensive Team pito ka higayon.
Ang 2014 Most Improved Player nakadaog sab sa PBA Order of Merit tulo ka higayon ug Sporstmanship Award duha ka higayon.
Sa laing bahin, si Tuadles, lumad gikan sa Argao, siyam ka higayon nga nakampiyon sa mabulokon niyang karera nga midagan og 14 ka seasons diin siya nakasul-ot sa uniporme sa Toyota, Great Taste, Ginebra, Alaska, Shell ug Presto.
Dugang niini, ang 1979 Rookie of the Year ug sakop sa Mythical Five nakapakita'g aksiyon kauban ang pipila ka mga ngilngig nga magduduwa sa labing unang propesyonal nga liga sa Asya sama nilang Ramon Fernandez, Robert Jaworski, Francis Arnaiz ug Abe King.
Ang 6'2" nga small forward nga unang mihimo og pangan sa dihang miduwa alang sa University of the Visayas (UV) Green Lancers gikan sa high school ngadto na sa kolehiyo miretiro niadtong 1992 uban ang 9,430 career points ug pipila ka mga pasidungog nga naglakip sa iyang pagkamiyembro sa Mythical Second Team niadtong 1984 ug pagbayaw kaniyang Most Outstanding Player niadtong 1990.
Human sa kalihukan karong gabii nga kabahin sa selebrasyon sa ika-50 nga amibersaryo sa liga, adunay laing programa sa rekognasyon nga ipahigayoin alang sa 50 Greatest sa pormal nga pagbukas sa Golden Season sa PBA karong Oktubre 5.
- Latest
