BluMerVin Gambit! nanghawod sa 4th Hinulawan Joyful Cup chessfest

CEBU, Philippines — Ang Team BluMerVin Gambit! nga gibandera nilang National Master Merben Roque, Vincent Balena ug Triton Blue Ares Garcia midominar sa Tatluhan category sa 4th Hinulawan Joyful Cup Chess Tournament 2025 ning bag-ohay pa lamang didto sa Toledo City Badminton Center sa Barangay Sangi.

Nagtabla sila uban ang Cebu AZ Kings ug Kingslayer bitbit ang managsamang 12.0 puntos apan ang BluMerVin Gambit! maoy milugwa nga kampiyon kortesiya sa mas taas nilang tiebreaker. Mibulsa sila og P15,000 nga ganting salapi.

Ang Cebu AZ Kings nilang Allan Salientes, Joel Pacuribot ug Angelo Tan nakadawat og P10,000 sa pagpahiluna nila sa ikaduhang dapit samtang ang Kingslayer nilang Chris Aldritz Pondoyo, Arena Grandmaster Michael Joseph Pagaran ug Marlowe Leyco ang mikubra sa P8,000 nga ikatulong premyo.

Ang Disruptors-Cebu nilang NM Arnolito Cadiz, Lemuel Montero ug Rosendo Yamyamin, DLS-CSB nilang NM Jasper Faeldonia, Daniel Baylosis ug John Laurence Donguines, ug ang Toledo Raging Kings nilang Christopher Tubalado, Bonn Rainauld Tibod ug Genesis Apog ang miokupar sa ikaupat ngadto sa ikaunom nga puwesto.

Naglangkob sa Top 10 ang Cebu Warriors nilang NM Rommel Ganzon, Antonio Cabibil ug Jupiter Sevillano, D'Great Teamwork-Bankal nilang Limuel Tampus, Arena International Master Kraig Quinain ug Errol Macoy Jr., BCC Warriors A nilang Michael Pinar, AIM Dennis Navales ug Spencer de Guzman, ug Ragnarok Team-Bacolod nilang Theseus Benitez, Joseph Navarra ug Romeo Sadia III.

Sa laing bahin, ang Ilonggo nga si Rolando Pamplona III gikan sa Passi City maoy naghari sa kiddies division sa usa ka adlaw nga torneyo nga giorganisa sa Toledo-Xignex Trojans inabagan sa Toledo LGU nga gipangulohan ni mayor Joie Perales.

Si Ralph Dakay sa Talisay City mitapos sa ikaduhang luna. Nagsunod kaniya sila si Kyle Zephyrr Abalo sa Naga City, Lex Padayao sa Cebu City ug Maica Cardenas sa Mandaue City.

Nagkumpleto sa Top 10 sila si Apple Rubin nga garbo sa Toledo, Ted Ivan Montoyo sa Bacolod City, Ana Nichole Gulben sa Mandaue, Dona Jane Rubin sa Toledo ug Martin Caylan sa Lapu-Lapu City.