Junior Altas biyaheng Finals

MANILA, Philippines — Kumolekta si rookie Dan Rosales ng 19 points, 6 rebounds, 2 assists at 1 steal sa 96-87 pagdaig ng University of Perpetual Help System DALTA sa San Beda University sa Final Four papasok sa NCAA Season 100 juniors basketball championship kahapon sa FilOil EcoOil Centre sa San Juan City.

Magbabalik ang No. 1 Junior Altas, nagbitbit ng ‘twice-to-beat’ advantage laban sa No. 4 Red Cubs, sa finals sa ikalawang sunod na pagkakataon matapos talunin ng back-to-back champions Letran Squires sa Season 99.

“I didn’t expect na makakapasok na naman kami sa finals, kasi ang lalakas ng kalaban eh,” ani coach Joph Cleopas. “I always told the boys that this season is anybody’s ballgame.”

Nag-ambag si Jan Roluna ng 15 points para sa Perpetual  habang tumipa si JD Pagulayan ng 13 markers, 5 rebounds at 1 steal.

“Expect lang po namin na mas maganda pa po iyong ipapakita namin sa finals at mas magtiwala lang kami sa isa’t isa para magawa iyong mga itinuturo ng mga coaches,” ani Rosales.

Sa ikalawang laro, tinakasan ng No. 3 St. Benilde-LSGH Greenies ang No. 2 Squires via overtime, 78-74, at makapuwersa ng ‘winner-take-all’ game para sa ikalawang finals spot.

Nagtala si Gian Gomez ng 18 points, 6 rebounds, 4 assists, 2 steals at 1 block para banderahan ang Greenies laban sa Squires.