Cebu City Niños kampiyon gihapon sa CVIRAA Meet
CEBU, Philippines — Bisan og mas gamay ang namina nilang bulawan kon itandi sa miagi nilang kampanya, ang Cebu City Niños milugwa gihapon nga overall champion sa Central Visayas Regional Athletic Association (CVIRAA) Meet 2025 niadtong weekend didto sa Bayawan City.
Gihuman sa Niños ang usa ka semanang torneyo alang sa mga elementarya ug high school nga estudyanteng atleta lukop Rehiyon 7 uban ang 105 ka gold, 89 ka silver ug 73 bronze medals.
Sa elementary division, ang Niños nakapugnit og 36 ka bulawang medalya nga ilang gisukipan og 28 ka silver ug 26 ka bronze.
Samtang sa secondary level, ang Niños dominate kaayo bitbit ang 69 ka gold, 61 ka silver ug 47 ka bronze.
Sa overall standings, ang Bohol Province mipahiluna sa ikaduhang puwesto uban ang 61-51-79 gold-silver-bronze nilang nakabkab.
Gisundan sila si Cebu Province (42-40-79), Dumaguete City (36-45-40) ug Mandaue City (31-43-56).
Naglangkob sa Top 10 mao ang Tagbilaran City (31-26-29), Lapu-Lapu (29-15-28), Negros Oriental (27-36-28), host Bayawan City (19-18-26) ug Toledo City (11-9-10).
Sa Para Games, ang Mandaue City miangkon sa numero unong puwesto uban ang 22 ka golds, 10 ka silvers ug siyam ka bronze.
Mi-okupar sa ikaduha ug ikatulong dapit ang Cebu Province (12-15-11) ug Cebu City (8-21-13).
Ang tanang gold medalists mangandam sunod alang sa mas dakong tahas nga mao ang pagrepresenta sa Central Visayas sa Palarong Pambansa 2025 nga gikatakda karong Mayo 24 ngadto sa Hunyo 2 didto sa Laoag City, Ilocos Norte.
- Latest
