FiberXers puro na sa semis
MANILA, Philippines — Lumapit sa semifinal berth ang No. 3 Converge matapos talunin ang No. 6 Rain or Shine, 130-118, sa Game One ng kanilang quarterfinals series sa Season 49 PBA Commissioner’s Cup kahapon sa Smart Araneta Coliseum.
Inilista ng FiberXers ang 1-0 lead sa kanilang best-of-three showdown ng Elasto Painters para dumikit sa semis ticket.
Humakot si import Cheick Diallo ng 35 points, 17 rebounds at 3 blocks para sa Converge na sinamantala ang pag-graduate ni Rain or Shine reinforcement Dion Thompson sa 8:34 minuto ng third period.
“Whenever you have an import tapos iyong kabila wala, malaking bagay iyon,” ani coach Franco Atienza. “Pero still we weren’t able to control that game noong third quarter. I think late in the fourth pa eh.”
Nagdagdag si Justin Arana ng 22 markers at 8 boards para sa FiberXers na bumangon mula sa isang 17-point deficit, 17-34, sa first quarter at ibaon ang Elasto Painters sa 122-108 sa fourth period.
Inagaw ng Converge ang 99-96 abante sa pagtatapos ng third canto bago iposte ang 14-point lead sa Rain or Shine tampok ang dunk ni Justine Baltazar kay Beau Belga sa 3:50 minuto ng final canto.
Nag-ambag si Jordan Heading ng 21 points para sa FibeXers at may 17 at tig-13 markers sina Schonny Winston, Alec Stockton at Baltazar, ayon sa pagkakasunod.
Pinamunuan ni Caelan Tiongson ang Elasto Painters sa kanyang 23 points habang tumapos si Thompson na may 14 markers bago natawagan ng ikaanim na foul.
- Latest
