Scaffoldings kinahanglang maiya sa siyudad

CEBU, Philippines — Human nitumaw ang mga isyu bahin sa mga scaffoldings nga gamiton sa pagpintal sa 130 ka public school buildings, ang Cebu City Local School Board nihatag og pagpasabot bahin niini ngadto sa Cebu City Council.

Apan, ang usa ka magbabalaod , wa gihapon makombinsir sa ilang mga argumento.

Ang sulat, pinetsahan og Oktubre 9, 2024, gipirmahan ni Engineer Churchill P. Español, Zoning Officer 1, ug gi- address ngadto kang Engineer Lowell Corminal, Acting Head sa Department of Engineering and Public Works (DEPW).

Kini nag-ingon nga isip LSB, ang ilang mandato mao ang pag-ayo ug pagmentinar sa kapin sa 130 ka mga pampublikong tunghaan sa dakbayan sa Sugbo, nga kadaghanan niini upat ka andana o medium-rise nga mga buildings.

Sumala sa LSB, ang paglakip sa mga scaffoldings sa Program of Works and Estimates (POWE) alang sa kontraktor makatabang sa pagsiguro nga kini cost-effective.

Ilang gipasabot nga kuwang ang kasamtangang scaffoldings sa bodega sa LSB. Ang mga ayuhonong buildings mga biya pa sa super typhoon Odette.

Guba ang mga atop ug kisame sa mga eskwelahan ug nalangan ang pag-repair niini tungod sa kakuwang sa mga scaffolding.

"Given the situation we decided not to rent the scaffold item since we needed it in our operations, using scaffolding will ultimately reduce labor timeand minimize the likelihood of accidents, which can lead to costly delays and claim," matud pa sa ilang suwat.

Gipasabot sab sa LSB nga pinaagi sa scaffoldings makasigurong luwas ang mga motrabaho subay sa regulasyon sa Occupational Safety and Health (OSH) .

Nangatarungan sab sila nga tungod kay ang mga scaffoldings ibalik kanila sa higayon nga ang mga proyekto mahuman na, magamit kini sa ubang mga departamento sa Cebu City Government sa umaabot.

Apan bisan pa sa maong mga katarungan, si Konsehal Nestor Archival Sr., wala gihapon “makontento” sa ilang mga rason.

Si Archival nga nahinabi sa The Freeman/Banat News kagahapon (Domingo) miingon nga ang mga kontraktor sa pagpintal aduna na untay kaugalingong safety gears lakip na ang scaffolding ug giisip niyang disadvantageous sa dakbayan ang pagpalit niini.

“Akong sentemento ana, alkanse ta, disadvantage ta, ngano man nga ibutang nato sa POWE, nga kanang scaffoldings, dili man na ato, sila man ang contractor ana nga mo provide, nya kung painting contractor naa gyud kay scaffoldings,” matud ni Archival .

Nabalaka usab siya kung pila na ang mga proyekto nga nahuman sa parehas nga setup sa mga pagpalit sa scaffolding.

“Perti na gurong daghana natong scaffoldings kun ila (kontraktor) pa nga giuli,” matud ni Archival.

Matud ni Archival, nalatid nga ang usa ka proyekto usahay magkinahanglan og pagpalit og scaffoldings nga mobalor og mga P500,000.

Matud ni Archival nga sa panahon pa ni Bise Mayor, karon City Councilor Joy Young, wa maapil sa POWE ang scaffoldings tungod kay aduna nay gipanag-iya ang siyudad. Tungod niini, si Archival niingon nga sa wala pa matuki ang kontrata sa pagpintal sa mga school buildings sa dakbayan, wala malatid nga i-turn over ang scaffoldings ngadto sa siyudad kun mahuman na.

Dugang pa niya nga ila usab nga nadiskubrehan nga nagsugod na ang proyekto bisan wala pa gihatagan og pagtugot sa konseho ang Cebu City Mayor sa pagpirma sa kontrata sa mga kontraktor.

Si Archival, usa ka kontraktor mismo, nakamatikod usab sa giingong overpricing sa mga items sa kontrata.

Tungod niini, si Archival niingon nga iyang gi-lobby nga ang mga scaffoldings nga nalakip sa POWE nga i-turn over sa posesyon sa siyudad kon mahuman na diin gi aprobahan sab sa konseho. (BANAT NEWS)