Mangtas nga Cavs padayong miratsada

CEBU, Philippines — Si Donovan Mitchell mipabuto og 36 puntos sa dihang gibalian og sungay sa Cleveland Cavaliers ang Chicago Bulls, 119-113, aron pagpabiling way pilde sa NBA kagahapon didto sa United Center sa Chicago, Illinois.

Gawas ni Mitchell, duna pay laing lima ka players sa Cleveland nga mikadlit og double figures apil na si

Darius Garland nga mihipos og 17 puntos ug si Evan Mobley nga mitali og 15 puntos.

Sila si Caris LeVert, Georges Niang ug Ty Jerome miamot og 12 puntos mata'g usa alang sa Cavs nga miinat sa ilang franchise record ngadto sa 12-0.

Si Zach LaVine miharos og 26 puntos samtang sila si Coby White ug Nikola Vucevic parehong miposte og 20 puntos apan nangahoyhoy ang ilang abaga gumikan kay ang Bulls natagak sa 4-7.

Didto sa Frost Bank Center sa San Antonio, Texas, si Victor Wembanyama mikolekta og 34 puntos, 14 ka rebounds ug unom ka assists aron pangulohan ang Spurs ngadto sa 116-96 nga pagpatikalbong sa Sacramento Kings.

Sa laing bahin, ang Oklahoma City Thunder dali nga nakabangon sa miagi nilang kaparotan sa Golden State Warriors human gipayaka ang Los Angeles Clippers, 134-128.

Si Shai Gilgeous-Alexander mipaulbo og 45 puntos samtang si Jalen Williams midugang og 28 puntos alang sa Thunder.

Sa ubang mga resulta, ang Brooklyn Nets mipahagba sa New Orleans Pelicans, 107-105, samtang ang Houston Rockets mibugha sa Washington Wizards, 107-92.