MPBA Season 3 ARQ miabante sa Elite Division finals

CEBU, Philippines — Ang defending champion ARQ Builders mipalagpot sa Matias Food Haus, 87-70, aron pag-angkon og luna sa Elite Division finals sa Mandaue's Pride Basketball Association (MPBA) Commissioner's Cup Season 3 didto sa Cebu Port Authority (CPA) Gym.

Si Ian Ortega mipabuto og 20 puntos uban ang upat ka rebounds samtang si Jandele Flores miposte og double-double nga 11 puntos ug 10 ka rebounds sa dihang ang ARQ mipaduol sa ilang misyon nga mapanalipdan ang ilang trono.

Midugang si Aloysius Odias og 10 puntos, duha ka rebounds ug duha ka assists alang sa ARQ nga kontrolado kaayo ang duwa sukad sila miestablisar og sayong 29-19 nga labaw.

Ang  kinadak-an nga bentaha sa ARQ nagbarog hinoon sa 17 puntos, 69-52, sa naghinapos nga bahin sa ikatulong kuwarter.

Sa Premier Division, si Archie Ladero mipaulbo og 28 puntos, upat ka rebounds ug duha ka assists sa dihang gilampaso sa Flago Prayboys ang Urestore, 124-81, aron pamartsa ngadto sa semifinals.

Si Marlon Pepito miharos og 19 puntos, 10 ka rebounds, ug unom ka assists, labaw lamang og usa ka lugas ni Anthony Ybanez nga mipupo og 18 puntos, 10 ka rebounds, ug unom ka assists.

Si Sabellano mitali og 14 punos samtang si Royet Varga mireshistro og talasaong triple-double nga 12 puntos, 10 ka rebounds ug 11 ka assists alang sa Prayboys, nga mosakbang batok sa twice-to-beat nga Metro Cars sa semis sunod semana.