Ginebra-TNT rematch selyado na

CEBU, Philippines — Selyado na ang seguradong eksplosibong rematch tali sa Barangay Ginebra Kings ug defending champion TNT Tropang Giga sa PBA Governors' Cup Finals.

Kini human gipatikangkang sa hingpit sa Gin Kings ang igsoon nilang koponan nga San Miguel Beermen luyo sa kulbahinam ug makutas nga daog, 102-99, sa Game 6 sa ilang best-of-seven semifinal series niadtong Domingo sa gabii didto sa Smart Araneta Coliseum sa Quezon City.

Gituldokan sa Gin Kings ang serye sa baraha nga 4-2.

Si Maverick Ahanmisi maoy nangu sa Ginebra uban ang 25 puntos samtang si Justin Brownlee mitali og 21 puntos, apil niini ang labing krusyal nga shot sa duwa nga maoy nag-aswat sa Gin Kings ngadto sa kadaogan.

Mipakita og maayong labok ang Beermen bisan pa'g ang 3-pointer ni Brownlee nakahatag sa Ginebra og 102-98 nga labaw sa hilimatyong segundos.

Human si June Mar Fajardo milansang og usa ka free throw, ang Beermen duna pa untay tsansa nga makapuwersa og overtime apan si EJ Anosike nasipyat sa iyang four-pointer ug si Jericho Cruz wala mapakasud sa gilabay niyang tres hinungdan sa ilang pakatikyaob.

Si Japeth Aguilar mihipos og 20 puntos ug unom ka rebounds, samtang si  RJ Abarrientos midugang og 10 puntos ug 14 ka rebounds alang sa Ginebra, nga makigharong sunod batok sa TNT nga mibuntog kanila sa 2023 Governors' Cup Finals.   

Magsugod ang ilang best-of-seven series karong Domingo, Oktubre 27.