USC Warriors milansang sa unang daog sa CESAFI

CEBU, Philippines — Ang University of San Carlos (USC) Warriors midominar sa Cebu Institute of Technology-University (CIT-U) Wildcats, 69-52, alang sa una nilang daog sa Cebu Schools Athletic Foundation, Inc. (CESAFI) Season 24 basketball tournament niadtong Domingo,  Oktubre 13, didto sa Cebu Coliseum.

Si James Paolo Gica mi-iskor og 14 puntos uban ang unom ka rebounds, duha ka assists ug usa ka steal, samtang si Kyle Maglinte midugang og 13 puntos, pito ka rebounds, usa ka assist ug duha ka steals aron tabangan ang Warriors pagpagkang sa upat ka sagunson nilang malas.

Ang Warriors abante lamang og singko puntos human sa first half, 31-26, apan milusad og mainit nga 19-9 rally sa ikatulong kuwarter aron inaton ang ilang labaw ngadto sa 50-35.

Si Jerian Marc Abello mipabuto og 20 puntos apan way nahimo gumikan kay ang Wildcats nahagba sa ikaduhang higayon sud sa tulo ka sinugdanan.

Sa laing bahin, ang University of San Jose-Recoletos (USJ-R) Baby Jaguars milatigo sa Benedicto College (BC) Baby Cheetahs, 63-40, aron solohon ang ikatulong puwesto sa juniors division standings bitbit ang 4-1 win-loss rekord.

Si Jan Vince Oringo, nga way sipyat sa walo niya ka free throws, maoy nangu sa Baby Jaguars uban ang double-double nga 14 puntos ug 12 ka rebounds.

Sila si  J Lord Pepito, Gynlester Epa ug Jan Francis Petilos nagkumbinar og 27 puntos ug 21 ka rebounds alang sa Baby Jaguars nga sa usa ka higayon nakabentaha og 26 puntos, 61-35.

Si John Kenneth Bihag mihipos og 16 puntos, pito ka rebounds ug duha ka assists alang sa Baby Cheetahs, nga nakatilaw sa ikalima nilang pilde nga giatbangan og usa pa ka daog.

Sa laing resulta, si Fritz John Cary Gonzales mikolekta og 15 puntos, siyam ka rebounds ug duha ka steals samtang si AJ Kyle de los Santos midonar og 13 puntos, usa ka rebound, tulo ka assists ug tulo ka steals sa dihang ang University of Southern Philippines Foundation (USPF) Baby Panthers  milampornas sa Don Bosco Technical College (DBTC)-Cebu Greywolves, 87-53.

Sila si Champ Davidson Brigoli ug Rhelance Lacerna mitali og 10 puntos matag usa alang sa Baby Panthers, nga kontrolado ang duwa sukad misutoy ngadto sa 42-24 nga labaw sa halftime, nga ilang gipang gipaburot ngadto sa 38 puntos, 87-49, sa hilimatyong segundos. Si Angelo de la Cruz adunay 12 puntos, lima ka rebounds ug duha ka assists alang sa Greywolves, nga natagak sa 1-4.